રાજકારણ:અલીખેરવા પંચાયતના વોર્ડ સભ્યના રાજીનામાથી ખળભળાટ

બોડેલીને તાલુકાની મોટી અલીખેરવા જૂથ ગ્રામ પંચાયતના વોર્ડ સભ્યે રાજીનામું આપી દેતા ખળભળાટ મચી જવા પામ્યો છે.અલીખેરવા પંચાયત સામે પૂર્વ તલાટી જશુ તલાટીએ આક્ષેપોની વણઝાર ચલાવી છે. તેવામાં વોર્ડ સભ્ય જીગ્નેશ ચોકસીએ તા.25 નવેમ્બરના રોજ પોતાની તબિયતને લઈને રાજીનામું ધરી દીધું હતું. ઉલ્લેખનીય છે કે જીગ્નેશ ચોકસીનો કોરોના પોઝિટિવ આવતા કોવિડ સેન્ટરમાં બે ત્રણ દિવસની સારવાર લઈને સાજા થઈને ઘરે પરત પણ આવી ગયા છે.

છતાંય તેઓએ હોદ્દા પરથી રાજિનામું આપતા તા.27 ના રોજ પંચાયતની મળેલી મિટિંગમાં રાજિનામુ મંજુર કરી દેવાયું હતું.વૈષ્ણવ યુવા સંગઠનના સક્રિય કાર્યકર જીગ્નેશ ચોકસી સામાજિક સેવા સાથે ગામના વિકાસમાં પણ સતત સક્રિય છે. ત્યારે તેઓ સામે પણ આક્ષેપો થતા તેઓએ રાજિનામુ આપી દીધું છે. વોર્ડ સભ્યના રાજિનામાંના પગલે બોડેલી પંથકમાં પંચાયતોને લઈને લોકોમાં ચર્ચા ઉઠી છે.