કમોસમી વરસાદે ખેડૂતની ચિંતા વધારી:બોટાદમાં વીજળીના કડાકા ભડાકા તેમજ કરા સાથે વરસાદ ખાબક્યો; ખેડૂતોને પાક સલામત સ્થળે ખસેડવા સૂચના

બોટાદ જિલ્લામાં બીજા દિવસે પણ વાતાવરણના પલટા સાથે કમોસમી વરસાદ પડતા ખેડૂતોની ચિંતામાં વધારો થયો છે. જિલ્લાના અનેક એવા વિસ્તારો કે જ્યાં વીજળીના કડાકા સાથે કરા પડ્યા હતા.

હવામાન ખાતાની આગાહી મુજબ આગામી તારી 19 માર્ચ સુધી ગુજરાત રાજ્યના અનેક એવા વિસ્તાર કે જ્યાં કમોસમી વરસાદ પડી શકે છે. તે મુજબની આગાહી વચ્ચે બોટાદ જિલ્લામાં ગઈકાલે સાંજના સમયે ભારે પવન વચ્ચે વરસાદ બાદ આજે સાંજના સમયે બોટાદ જિલ્લાના લાઠીદડ તેમજ ગઢડા તાલુકાના ઢસા, પડવદર, સમઢીયાળા, સીતાપર, ગુંદાળા, ઘોઘા, સમડી, પાટણ, પીપરડી સહિતના ગામોમાં વીજળીના કડાકા સાથે અનેક ગામોમાં વરસાદ સાથે કરા પડ્યા હતા.

હવામાન ખાતાની વરસાદ પડવાની આગાહી વચ્ચે ખેડૂતોની ચિંતામાં સતત વધારો જોવા મળી રહ્યો છે. ત્યારે હવામાન ખાતાની આગાહી મુજબ બોટાદ જિલ્લાના અનેક એવા વિસ્તારોમાં ચોમાસા જેવા માહોલ વચ્ચે વીજળીના કડાકા અને કરા સાથે વરસાદ પડતા ખેડૂતોની ચિંતામાં ઉભા પાકને નુકસાન થવાની ભીતિ સાથે સતત ખેડૂત અને ખેડૂત પરિવાર ચિંતાના માહોલમાં જોવા મળે છે.

હવામાન ખાતાની આગાહીને અનુલક્ષીને 19 માર્ચ સુધી બોટાદ જિલ્લામાં કમોસમી માવઠું, સામાન્ય વરસાદની આગાહી કરવામાં આવી છે. આવા સમયે વાદળછાયું વાતાવરણ રહેવાના કારણે મોટા ભાગે ખેડૂતો દ્વારા પાકના રક્ષણ માટે ઉચિત પગલા લેવામાં આવતા જ હોય છે. તેમ છતાં નીચે મુજબના તકેદારીના પગલા લેવા રાજ્યના ખેડૂતોને સંદેશ આપવામાં આવ્યો છે. પાકને કમોસમી વરસાદથી થતા નુકસાનથી બચાવવા માટે ખેડૂતોના ઉત્પાદિત પાક, ખેતરમાં કાપણી કરેલા ખુલ્લાં પાક તાત્કાલિક સલામત સ્થળે ખસેડવાની કાર્યવાહી કરવા સૂચના આપવામાં આવી છે.

ખેડૂતો આ પગલાં ભરી નુકસાનથી બચી શકે
પ્લાસ્ટિક તાડપત્રીથી યોગ્ય રીતે પાકને ઢાંકી દેવો અને ઢગલાની ફરતે માટીની પાળ બનાવી વરસાદનું પાણી ઢગલાની નીચે જતું અટકે તેવા પગલા ભરવા જોઈએ. શાકભાજી અથવા બાગાયતી પાકો ઉતારી લેવા, જંતુનાશક દવા અને ખાતરનો ઉપયોગ આ સમયગાળા પૂરતો ટાળવો. ખાતર અને બિયારણના વિક્રેતાઓએ જથ્થો પલળે નહીં તે મુજબ ગોડાઉનમાં સુરક્ષિત રાખવા. એ.પી.એમ.સી.માં વેપારી અને ખેડૂત મિત્રોએ કાળજી રાખી સાવચેતીના આગોતરા પગલાં લેવા અનુરોધ કરવામાં આવ્યો છે. એ.પી.એમ.સી.માં અનાજ અને ખેતપેદાશો સુરક્ષિત રાખવા જણાવાયું છે.