કોરોના મહામારી:રાપરમાં હોમ ક્વોરન્ટાઇનના ભંગ બદલ પોલીસ ફરિયાદ સહિતના પગલાં ભરાશે

હાલ રાપર તાલુકામાં  મહારાષ્ટ્ર, મુંબઈ, સુરત, વડોદરા, અમદાવાદ સહિતના રેડ ઝોન વિસ્તારમાંથી મોટી સંખ્યામાં રાત દિવસ આવી રહેલા લોકોના કારણે સમગ્ર વહીવટી તંત્ર ઊંધે માથે થયું છે  ત્યારે કચ્છમાં સૌથી વધુ લોકો રાપર તાલુકામા આવતા હોઇ રાપરમાં  જિલ્લા વિકાસ અધિકારીની અધ્યક્ષતામાં યોજાયેલી બેઠકમાં કોરોના વાયરસના રક્ષાત્મક ઉપાયો વિશે માર્ગદર્શન અપાયું હતું.

વાગડ વિસ્તારમાં  રેડ ઝોનમાંથી લોકો આવી રહ્યા છે તે  તમામને હોમ કવોરન્ટાઇન
જિલ્લા વિકાસ અધિકારી પ્રભવ જોશીએ  જણાવ્યું હતું કે વાગડ વિસ્તારમાં  રેડ ઝોનમાંથી લોકો આવી રહ્યા છે તે  તમામને હોમ કવોરન્ટાઇન કરવામાં આવી રહ્યા છે.  આ માટે આરોગ્ય વિભાગને  સુચના આપવામાં આવી છે. આ  ઉપરાંત આરોગ્ય તપાસણી સહિતના ઝડપી પગલાં લેવામાં આવે તેવી તાકીદ પણ કરવામા આવી છે.  લોકો જો હોમ કવોરન્ટાઇનનો ભંગ કરે તો પોલીસ ફરિયાદ સહિતના પગલા ભરાશે તેમ તેમણે ઉમેર્યું હતું. તાલુકા પંચાયત કચેરીની પણ મુલાકાત  બાદ ડીડીઓ જડસા અને બુઢારમોરા જવા રવાના થયા હતા. બેઠકમાં પ્રાંત અધિકારી કલ્પેશ કોરડીયા, તાલુકા વિકાસ અધિકારી ડી. જે. ચાવડા, મામલતદાર એચ. જી પ્રજાપતિ, મેડિકલ ઓફિસર ડો. ભાર્ગવ, તાલુકા હેલ્થ ઓફિસર ડો પૌલ, ચીફ ઓફિસર મેહૂલ જોધપુરા, પ્રકાશ ચૌહાણ, રામજી  પરમાર,  હરેશ પરમાર,  કંચનબેન સુવારીયા વગેરે ઉપસ્થિત રહ્યા હતા.