સરાહનીય કામગીરી:પલટી ખાધેલી કારમાં ફસાયેલા યુવાનને પોલીસે પાના-પકડ હાથમાં લઇ બચાવ્યો

પૂર્વ કચ્છ પોલીસ દ્વારા આજે અકસ્માતમાં ફસાયેલ એક યુવાનને બચાવીને માનવતા ઉજાગર કરાઇ હતી.જિલ્લામાં નાસતા ફરતા આરોપીઓને દબોચી લેવાં ખાસ કોબિંગ નાઈટનું આયોજન હાથ ધરાયુ હતું જેમાં આજે રાપર પીઆઇ જે.એચ.ગઢવી,લાકડીયા પીઆઇ કુલદીપસિંહ સોલંકી, બાલાસર પીએસઆઈ બી.જે. પરમાર અને તેમની ટીમો દ્વારા સંયુક્ત કોબિંગ નાઈટમાં જઈ રહ્યાં હતાં ત્યારે રાપર થી ત્રણ કિલોમીટર દૂર રાપર-પ્રાગપર રોડ ઉપર રસ્તા થી 200 ફૂટ દૂર એક કાળા કલર ની સ્વીફ્ટ ગાડી પલટી ખાઈ ગયેલી હાલત માં પડી હતી.

અને તેમાં બચાવો બચાવો નો અવાજ આવતાં તાત્કાલિક ત્રણેય અધિકારીઓ પોતાનાં વાહન થાંભાવી ને નીચે ઉતર્યા હતા જેમાં ચારે ટાયરો ઉપર અને સંપૂર્ણ ભાંગી ને ભૂકો થઈ ગયેલી કાળા કલર ની સ્વીફ્ટ ગાડીમાં ડ્રાઈવર સાઈડમાં એક યુવાન ફસાયેલી હાલત માં બુમો પાડતો નજરે ચડ્યો હતો જેના કારણે તાત્કાલિક પોલીસ અધિકારીઓ એ પોતાનાં સ્ટાફ ને આદેશ કરીને પાના પકડ અને ટામી દ્વારા મહામુસીબતે ફસાયેલા ડ્રાઈવરને હેમખેમ બહાર કાઢ્યો હતો અને માનવતાનું ઉદાહરણ પૂરું પાડ્યું હતુ.

જો સમય સર પોલીસના આવત તો અડધી રાત્રે રોડની સાઈડમાં પલટી ખાઈ ગયેલી ગાડી કોઈ ને નજર આવે તેમ પણ નહોતી પણ પોલીસ અધિકારીઓની મહેનત અને કોઠાસૂઝના કારણે ડ્રાઈવર ની જિંદગી બચાવી લેવાઈ હતી જેમાં સ્વીફ્ટ ગાડી ચાલક રાપર તાલુકાના સોનલવા ગામના ધનરાજભા ખીમરાજભા ગઢવી હોવાનું જાણવાં મળ્યું હતું અને તેઓ રાપર આવી રહ્યાં હતાં.

ત્યારે રોડ ઉપર જનાવર આડું આવતા તેને બચાવવા જતા ગાડી પલટી ખાઈ ગઈ હતી. જેમાં ગાડી નો ભૂકો બોલી જતા તેઓ ગાડી ની અંદર જ ફસાઈ ગયાં હતાં પણ પોલીસ અધિકારીઓ અને સ્ટાફ આવી જતાં તેમને હેમખેમ બહાર કઢાયા હતા જેમાં તેમને કોઈપણ જાત ની ઈજાઓ થઈ ના હતી આ કામગીરીમાં જમાદાર રાસુભા જાડેજા,નરેન્દ્રસિંહ ઝાલા,નરેન્દ્ર ચૌધરી, મુકેશ ચાવડા,હસમુખભાઈ સિંધવ,અને બાબુભાઇ કાલોતરા, વગેરે રાપર પોલીસ સ્ટાફ સાથે લાકડીયા પોલીસ સ્ટાફ અને બાલાસર પોલીસ સ્ટાફ જોડાયો હતો તો પોલીસ ને જોઈ ને બીજા ટ્રક ચાલકો અને લોકો પણ મદદે આવ્યાં હતા.