અકસ્માત:રાપરના દેશલપર પાસે ડમ્પર અડફેટે યુવાન બાઇક સવારનું મોત નીપજ્યું

રાપર તાલુકામાં ચાલતાં ઓવરલોડ માટીના ડંફરો અવારનવાર અકસ્માત સર્જતાં હોય છે જેમાં અનેક આશાસ્પદ યુવાનો કાળ નો કોળિયો બન્યાં છે પણ પૂર્વ કચ્છ ખનીજ વિભાગની આળસ નથી ઊડતી જેના કારણે આજે રાપર તાલુકાના દેશલપર નજીક ખેતરેથી બાઈક લઈ ને ઘરે જઈ રહેલાં આશાસ્પદ યુવાનને માટીની ગાડીએ અડફેટે લેતાં ઘટના સ્થળે જ કમકમાટીભર્યું મોત નીપજ્યું હતું.પ્રાપ્ત વિગતો અનુસાર રાપર તાલુકાના દેશલપર ના રહેવાસી કાદર ખાન વલીખાન સમેજા (ઉ.વ.20) સાંજ ના 6 વાગ્યાં ના અરસા માં ખેતરે થી કામ પતાવી ને એમ એચ 03 એ.સી 834 નંબર નું બાઈક લઈ ને ઘરે જઈ રહ્યો હતો રાપર બાજુ થી પુરપાટ ઝડપે આવી રહેલી ગાડી નંબર જીજે-12- બી.ડબ્લ્યુ-8821 વાળાએ બાઈકને અડફેટે લેતાં બાઈક અને યુવાન દૂર ફંગોળયા હતા

જેના કારણે યુવાનનું ઘટના સ્થળે જ કમકમાટીભર્યું મોત નીપજ્યું હતું. આશાસ્પદ યુવાન નું મોત નિપજતાં મુસ્લિમ સમાજના લોકો અને સગા સ્નેહીજનો મોટી સંખ્યામાં રાપર સરકારી હોસ્પિટલ ખાતે ઉમટી પડ્યાં હતાં. પરિવારમાં માતમ છવાયો હતો.આશાસ્પદ યુવાનનું મોત થતાં આવેલા સગા સ્નેહીજનો દ્વારા મોરબીની ટ્રકના માલિક હમીર આહીરને ફોન કરતાં માટીના ડંમ્પરના માલિકે ઉદ્ધતાઇ પૂર્વક જવાબ આપ્યો હતો અને કહ્યું હતું કે મારી ગાડી ના કાગળો બરાબર છે અને રોજ માટીના ફેરા કરે છે તમારા છોકરાનો જ વાંક હતો તમારે ગાડી સળગાવી દેવી હોય તો સળગાવી નાખો .

ડ્રાઈવર કલીનરને મારવા હોય તો મારો અને કેસ કરવો હોય તો કેસ કરો તેવા જવાબો આપ્યાં હતાં જેના કારણે ઉપસ્થિત લોકોમાં રોષની લાગણી ફેલાઇ હતી અને દેશલપર નજીકથી પસાર થતી ઓવરલોડ માટી ની ગાડીઓ હવે પછી પસાર નહિ કરવા દેવાનું જણાવતાં હતા.