• Gujarati News
  • Local
  • Gujarat
  • Bhuj
  • Within 24 Hours Of Her Husband's Death, His Wife Also Committed Suicide By Taking Drugs. In One Day, Two Children Lost The Protection Of Their Parents.

પતિના વિયોગમાં પત્નીની આત્મહત્યા:કચ્છના તુંબડી ગામમાં પતિનું મોત થતા પત્નીએ એસિડ પી લઈ આત્મહત્યા કરી, બે સંતાનોએ બે દિવસમાં માતા-પિતાની છત્રછાયા ગુમાવી

ભુજએક મહિનો પહેલા
  • કૉપી લિંક
લીલાબા અને સવુભાની ફાઈલ તસવીર - Divya Bhaskar
લીલાબા અને સવુભાની ફાઈલ તસવીર
  • પતિના વિયોગમાં આત્મહત્યા કરનાર માતાએ બે માસૂમ સંતાનો સામે પણ ના જોયું

કચ્છ જિલ્લાના મુન્દ્રા તાલુકાના મોટી તુંબડી ગામમાં રહેતો એક જાડેજા પરિવાર બે જ દિવસમાં વેરવિખેર થઈ ગયો. પતિના કુદરતી મોતના વિયોગમાં પત્નીએ એસિડ પી લઈ આત્મહત્યા કરી લેતા બે વર્ષના બાળક અને 5 વર્ષની બાળકીએ માતા-પિતાની છત્રછાયા ગુમાવવાનો વારો આવ્યો છે.

ટુંબડી ગામની ડેલીની તસવીર
ટુંબડી ગામની ડેલીની તસવીર

કચ્છ જિલ્લાના મુન્દ્રા તાલુકાના મોટી તુંબડી ગામમાં રહેતા સવુભા નવુભા જાડેજા ગાર્ડનનું કામ સંભાળતી કંપનીમાં ફરજ બજાવતા હતા. ગઈકાલે સવારે 30 વર્ષીય સવુભા કંપનીમાં ફરજ બજાવી રહ્યા હતા ત્યારે જ હ્રદયરોગનો હુમલો આવતા તેને પ્રાથમિક સારવાર આપ્યા બાદ ભુજની જીકે જનરલ હોસ્પિટલમાં ખસેડવામા આવ્યા હતા. જ્યાં સારવાર દરમિયાન તેમનું મોત નિપજ્યું હતું. યુવાનના નિધન બાદ તેના નશ્વર દેહને તેના ગામમાં લઈ જઈ સમાજના રીતિ રિવાજ મુજબ અંતિમવિધિ કરવામા આવી હતી.

ભુજની જી.કે.જનરલ હોસ્પિટલ
ભુજની જી.કે.જનરલ હોસ્પિટલ

પતિના નિધનના વિયોગમાં પત્નીએ આત્મહત્યા કરી
પતિના નિધન બાદ અંતિમવિધિ પૂર્ણ થયાને હજી તો ચોવીસ કલાક પણ પૂર્ણ થયા ન હતા ત્યાં જ સવુભાના પત્ની લીલાબાએ પતિના નિધનના વિયોગમાં એસિડ પી લેતા સૌ પહેલા ભુજની ખાનગી હોસ્પિટલમાં અને ત્યારબાદ ભુજની જીકે જનરલ હોસ્પિટલમાં સારવાર માટે ખસેડવામા આવ્યા હતા. જ્યાં આજે સવારે પોણા આઠ વાગ્યે તેમણે અંતિમ શ્વાસ લીધા હતા.

બે સંતાનોએ માતાપિતાની છત્રછાયા ગુમાવી
સવુભા અને લીલાબાના અંદાજિત સાત વર્ષ પહેલા લગ્ન થયા હતા. લગ્નજીવન દરમિયાન દંપતીને સંતાનમાં પાંચ વર્ષની પુત્રી અને 2 વર્ષનો પુત્ર છે. બે દિવસમાં માતા-પિતાના નિધન થતા બંને સંતાનોએ માતા-પિતાની છત્રછાયા ગુમાવી છે. દંપતીના નિધનના પગલે નાના એવા તુંબડી ગામમાં શોકનો માહોલ છવાયો છે.

અન્ય સમાચારો પણ છે...