વાતાવરણ:સૌથી શીત નલિયા 9 ડિગ્રી સિવાય રાજ્યમાં શિયાળાએ ભર્યા ઉચાળા

આજે મંગળવારે વસંત પંચમી પૂર્વે પણ ઠંડી કેડો ન મૂકતી હોય તેમ નલિયા 9 ડિગ્રી સાથે રાજ્યભરમાં ઠર્યું હતું. આ સિવાય રાજ્યભરમાં ન્યૂનતમ પારો બે આંકમાં નોંધાયો હતો. ભુજમાં સવારે ઝાકળ વર્ષા બાદ દિવસભર ઉનાળાનો અહેસાસ થયો હતો. મહત્તમ 28.6 અને ન્યૂનતમ 9ના આંક સાથે નલિયામાં હવામાનની વિષમતા જારી રહી હતી. જિલ્લા મથક ભુજમાં વહેલી સવારે ભારે ઝાકળ વર્ષાથી ધૂંધળો માહોલ જોવા મળ્યો હતો. ઉંચું તાપમાન 32.2 ડિગ્રી રહેતાં દિવસભર ગરમી અનુભવાઇ હતી. કંડલા એરપોર્ટ મથકે 31.7 અને 15.4 જ્યારે કંડલા પોર્ટ પર 30.9 અને 16.3 ડિગ્રી નોંધાવાની સાથે શિયાળો હવે વિદાય લેતો જણાયો હતો.