વ્યાપક આયોજન:કચ્છની શાળા, દવાખાના, સંસ્થાઓમાં ખુલશે રસી કેન્દ્રો

કોરોના મહામારીને લઇને જાન્યુઆરીમાં કચ્છમાં પ્રથમ ફેઇઝમાં રસી આપવાની કામગીરી શરૂ થવાની છે, જેમાં ચૂંટણી બૂથની જેમ જિલ્લામાં શાળા, દવાખાના, સંસ્થાઓમાં રસી કેન્દ્રો ખોલવામાં આવશે. કોરોના મહામારીની પકડ જિલ્લાના મુખ્ય ત્રણ શહેરો જેવા કે, ભુજ,અંજાર અને ગાંધીધામમાં વધુ મજબૂત બનતી જાય છે. ખાસ કરીને જિલ્લા મથક ભુજ અને તાલુકામાં સંક્રમણ વધતું જાય છે ત્યારે વકરતા જતા કોવિડ-19ના થોકથામ માટે કચ્છમાં જાન્યુઆરીથી રસીકરણ કરવામાં આવશે, જેને લઇને જિલ્લા આરોગ્ય વિભાગે કમર કસી છે અને સરવેનો ધમધમાટ ચાલી રહ્યો છે.

જિલ્લા આરોગ્ય અધિકારી પ્રેમકુમાર કન્નરે જણાવ્યું હતું કે, રસીકરણની કામગીરી સુવ્યવસ્થિત કરવા માટે ચૂંટણી પધ્ધતિ અપનાવવામાં આવશે. એટલે કે, ચૂંટણીની જેમ બૂથ લેવલે કામગીરી કરવા માટે ત્રણ રૂમની સુવિધા હોય તેવી જિલ્લાની પ્રાથમિક, માધ્યમિક શાળાઓ, દવાખાના, સંસ્થાઓમાં રસી કેન્દ્રો ખોલવામાં આવશે. દરેક બૂથ ઉપર એક દિવસમાં 100 વ્યક્તિને જ રસી આપવામાં આવશે.

રસી માટે 70 હજાર સિરીજ ભુજ આવી પહોંચી
કોરોના મહામારીને અનુલક્ષીને વેક્સિન માટે 70 હજાર 0.55 સી.સી. સિરીજ મંગળવારે રાજકોટથી ભુજ આવી પહોંચી હતી. આ અંગે વિગતો આપતા જિલ્લા આરોગ્ય અધિકારી ડો. પ્રેમકુમાર કન્નરે જણાવ્યું હતું કે, રાજકોટથી આવેલી સિરીજ ભુજમાં જિલ્લા કક્ષાના સ્ટોર રૂમમાં મૂકવામાં આવી છે.