છેતરપિંડી:90 લાખની ઠગાઇમાં ફરિયાદીએ નિવેદન લખાવ્યું, સાહેદોના બાકી

ભુજમાં સસ્તા સોના તેમજ ચલણી નોટ બદલી આપવાના નામે ચીટિંગ કરતી ટોળકીઓ સક્રીય છે. છ વર્ષ જુનો ઠગાઇનો બનાવ એ ડિવિઝન પોલીસ મથકે નોંધાયો હતો જેમાં નોંધાયેલી ફરિયાદ અધુરાશવાળી હોવાથી ફરિયાદીને નિવેદન માટે બોલાવાયો હતો જો કે સાહેદોના નિવેદન બાકી હોવાથી તપાસ અટકી ગઇ છે. તો અન્ય ઠગાઇના અન્ય બે બનાવોમાં માત્ર એક એક આરોપી જ પકડાયા છે બાકીના તમામ ફરાર છે.

ગત મહિને ભુજ એ ડિવિઝન અને બી ડિવિઝનમાં છેતરપિંડીના ત્રણ ફોજદારી નોંધાઇ છે. એ ડિવિઝન પોલીસ મથકે છ વર્ષ પૂર્વે 90 લાખ રૂપિયાની ઠગાઇ કરાઇ હતી જે બનાવમાં ટુંકા નામ અને એડ્રેસ તેમજ આંગડીયા મારફતે એટલી મોટી રકમ બે ટુકડે હવાલાથી મોકલાઇ હોવાનો તેમજ એલસીબીને અગાઉ અરજી અપાઇ હોવાનું ફરિયાદમાં જણાવાયું હતું. જે બનાવમાં એ ડિવીઝનના પી. એમ. ચાૈધરીએ જણાવ્યું હતું કે, આટલા જુના બનાવમાં ફરિયાદીને બોલાવી નિવેદન લેવાયા છે, તેના સાહેદોના નિવેદન લેવાના બાકી છે.

આધાર, પુરાવાઓ એકત્ર થયા બાદ આગળ તપાસ ધપાવી આરોપીઓની ધરપકડ કરવામાં આવશે. તો બીજી તરફ, બનાસકાંઠાના દિયોદર ગામના બે શખ્સો પાસેથી છેતરપિંડી કરી લેવાતા જુદી જુદી બે ફરિયાદ બી ડિવિઝન પોલીસ મથકે નોંધાઇ છે. બે ફરિયાદમાં અમુક આરોપી સમાન છે. જે બંને ગુનામાં એક એક આરોપી હજુ સુધી પકડાયા છે બાકીના અન્ય આરોપીઓ હજુ ફરાર હોવાનું જાણવા મળ્યું છે.

એક ગુનામાં બેંક મેનેજર પાસેથી સસ્તા સોના તેમજ ચલણી નોટના નામે 14.80 લાખ રૂપિયા પડાવી લેવાયા છે જેમાં છ જેટલા આરોપી નાસતા ફરતા છે. તો બીજો બનાવ પાંચ લાખ રૂપિયાનો છે એમાં પણ ત્રણેક આરોપી નાસતા ફરતા છે.