ક્રાઇમ:દિયોદર પોલીસની હદમાંથી ભુજ RR સેલએ સવા લાખ દારૂના જથ્થા સાથે બેને પકડ્યા

બનાસકાંઠાના દિયોદર પોલીસ મથકની હદમાં બાતમીના અાધારે ભુજ સરહદી રેન્જના આરઆરસેલની ટીમે સવા લાખનો દારૂનો જથ્થો ભરીને કારમાં લઇ અાવતા બે રાજસ્થાની શખ્સોને ઝડપી પાડ્યા હતા. જ્યારે દારૂ ભરી અાપનારા શખ્સ દરોડા દરમિયન નાસી છુટતાં ત્રણ અારોપી વિરૂધ પોલીસ મથકે ગુનો નોંધાવ્યો હતો.

પ્રાપ્ત વિગતો મુજબ સોમવારે વહેલી સવારે બનાસકાંઠાના દિયોદર તાલુકામાં પેટ્રોલિંગ રહેલા ભુજ અાર અાર સેલના સ્ટાફે દિયોદર તાલુકાના રાંટીલા ગામ પાસેથી વિદેશી દારૂ ભરેલી નંબર પ્લેટ વિનાની કારને રોકવાની કોશીશ કરતા ચાલક દ્વારા પુરઝડપે કાર હંકારી દેતા પોલીસ સ્ટાફ દ્વારા કારનો પીછો કરી કુવાતા ગામ પાસેથી ઝડપી લીધી હતી. કારમાંથી પોલીસે વિદેશી દારૂની 1,070 બોટલ કિંમત રૂપિયા 1,25,600, મોબાઇલ નંગ-3 કિંમત રૂપિયા 3,000 તેમજ કાર કિંમત બે લાખ મળી કુલ રૂ.3,28,600 નો મુદ્દામાલ કબજે કર્યો હતો જ્યારે કાર ચાલક રાજસ્થાની અનિલકુમાર ભગીરથરામ વિશ્નોઈ અને શિવરતન ઓમપ્રકાશ અગ્રવાલ નામના બે શખ્સને દબોચી ગયા હતા તેમજ દારૂ ભરી અાપનરો વિક્રમ રાજપૂત ગાડીમાંથી ઉતરી નાસી ગયો હતો.

પોલીસે ત્રણેય શખ્સો વિરૂધ દિયોદર પોલીસ મથકમાં પ્રોહીબીશનનો ગુનો નોંધાવ્યો હતો. ઉપરોક્ત કામગીરી ભુજ રેન્જના પોલીસ મહાનિર્દેશક જે.અાર.મોથલીયા તથા પીઅાઇ બી.અેસ. સુથાર અને પીઅેસઅાઇ જે.અેમ.જાડેજા તેમજ અેન.વી. રહેવરના માર્ગ દર્શન હેઠળ તેમના સ્ટાફના કર્મચારીઓઅે કરી હતી.