ગ્રાન્ટ:મુન્દ્રામાં આરોગ્ય સેવાને વધુ સુદ્રઢ બનાવવા માટે તંત્રએ 3 કરોડ રૂપિયા ફાળવ્યા

ભુકંપ બાદ સમગ્ર કચ્છની સાથે મુન્દ્રાનો પણ વિકાસ- વિસ્તાર ખૂબ પ્રગતિ પામ્યો છે. જિલ્લા આરોગ્ય અધિકારીના જણાવ્યા અનુસાર તંત્રએ મુન્દ્રાની આરોગ્ય સેવાને વધુ મજબૂત બનાવવા માટે 3 કરોડ રૂપિયા ફાળવ્યા છે. મુન્દ્રા હજુ વિકાસશીલ છે, જેથી તેમાં આરોગ્યની સેવા વધુ સુદ્રઢ બનાવવા માટે ડૉ. સયમાં પ્રસાદ રૂરલ ડેલલોપમેન્ટ ઓથોરિટી મારફતે જિલ્લા પંચાયતના હસ્તે ગ્રાન્ટ આપતા હોય છે.

જેના અનુસંધાને આજે જિલ્લા આરોગ્ય કચેરી ભુજ ખાતે એક બેઠક મળી હતી. આ બેઠક ભુજ ખાતે મુન્દ્રામાં નવા સંકુલના બાંધકામ અંગે જિલ્લા વિકાસ અધિકારીની અધ્યક્ષતામાં આયોજીત કરવામાં આવી હતી. આ બેઠકના અંદર તંત્રએ જે 3 કરોડ રૂપિયા ફાળવ્યા છે તેના ઉપર પણ ચર્ચા કરવામાં આવી હતી.

ગ્રાન્ટને વર્ક ઓર્ડર પણ આપવામાં આવ્યો
આ બેઠક પછી જિલ્લા આરોગ્ય અધિકારી ડૉ. માંઢકે વિગતો આપતા જણાવ્યુ હતું કે, ભારત સરકારના સહયોગથી અને જિલ્લા પંચાયતના નેજા હેઠળ મુન્દ્રા ખાતે સામુહિક આરોગ્ય કેન્દ્રના નવા સંકુલ માટે રૂ 2.71 કરોડની ગ્રાન્ટ પાસ કરવામાં આવી ગઈ છે અને તેને વર્ક ઓર્ડર પણ આપાઈ ગયો છે. તેની સાથે અહીંયા આરોગ્ય સેવાની પૂરતી કરવા માટે રૂ 30 લાખ ફાળવવાની મંજૂરી પણ આપાઈ ગઈ છે, જેમાં ડિજિટલ એક્સરે મશીન ,લેબોરેટરી માટે સેલ કાઉન્ટર અને સર્જરી કરવાનું મશીન પણ ફાળવવામાં આવશે.