નગરપાલિકા:બોલો, ભુજ પાલિકાએ ભરઉનાળે પાણીના ટેન્કરની નોંધણી બંધ કરી, સાત દિવસ પહેલા નોંધણી કરાવનારાને પણ ટેન્કરથી ન મળ્યું

ભુજ નગરપાલિકાની વોટર સપ્લાય બ્રાન્ચ નળ વાટે અઠવાડિયામાં એક વખત પાણી વિતરણ કરી રહી છે. અધૂરામાં પૂરું સોમવારથી ટેન્કર વાટે નોંધણી પણ બંધ કરી દીધી છે અને સોમવાર સુધી નવી નોંધણી નહી કરે. એ વચ્ચે સાત દિવસ પહેલા નોંધણી કરાવનારાના ઘરે પણ પાણી ન પહોંચતા લોકોએ નગરપાલિકામાં પૂછપરછ શરૂ કરી દીધી છે. પરંતુ, કોઈ દાદ આપનારું નથી.
નોંધણી કરાવનારાને ઘરે પાણીનું ટેન્કર પહોંચ્યું નથી
ભુજ નગરપાલિકા દ્વારા શહેરને નળ વાટે પીવાનું પાણી પૂરું પાડવામાં આવે છે. જે વિતરણ નર્મદાના પાણી આધારિત છે. સ્થાનિક સ્રોત ખૂબ જ અોછા છે. હાલ ભરઉનાળે નગરપાલિકાએ નળ વાટે પાણી વિતરણમાં અખાડા શરુ કરી દીધા છે. બીજી બાજું ટેન્કર મારફતે પાણી વિતરણની નોંધણી પણ બંધ કરી દીધી છે, જેથી શહેરીજનો ભારે મુશ્કેલીમાં મૂકાઈ ગયા છે. નળ વાટે તો ઠીક પણ સાતેક દિવસ પહેલા પાણીના ટેન્કરની નોંધણી કરાવનારાને ઘરે પાણીનું ટેન્કર પહોંચ્યું નથી, જેથી લોકોએ નગરપાલિકામાં આંટાફેરા કરી દીધા છે. પરંતુ, સંતોષકારક પ્રત્યુત્તર મળતો નથી. ગુરુવારે પદાધિકારીઅો અને અધિકારીઓ હાજર ન હતા. ટેન્કર નોંધણીને રસી લઈ ફરનારાને કહેવામાં આવતું હતું કે, રાવલવાડી પાણીના ટાંકે જાવ. અહીં  રજુઆત ન કરો.