પરિક્ષણ:ગુજરાતમાં કોરોનાના કારણ અને મારણ પર સંશોધનને અવકાશ

ભુજ2 વર્ષ પહેલા
  • કૉપી લિંક
ડો. ડી. એન. લાન્જેવાર - Divya Bhaskar
ડો. ડી. એન. લાન્જેવાર
  • ભુજની અદાણી મેડિકલ કોલેજના ઓટોપ્સી (શબ પરિક્ષણ) નિષ્ણાંતનો મત

ગુજરાતમાં કોરોનાના વધતા સંક્રમણનું કારણ જાણવા અને તેને નાથવાના ઉપાયો હાથવગા કરવા માટે મહામારીથી મૃત્યુ પામેલાઓના મૃતદેહોનું શબ પરિક્ષણ( ઓટોપ્સી) કરવા માટે  અદાણી સંચાલિત જી.કે. જનરલ હોસ્પિટલ અને મેડિકલ કોલેજના પેથોલોજી વિભાગના વડાએ ભાર મુક્યો છે. તબીબી વિજ્ઞાન (ક્લિનિકલ) અને પેથોલોજી ઓટોપ્સીના તજજ્ઞ ગણાતા ડો. ડી. એન. લાન્જેવારના ઓટોપ્સી અંગેનાં મંતવ્યની માત્ર રાજ્યમાં જ નહિ પરંતુ,  રાષ્ટ્ર અને આંતરરાષ્ટ્રીય ક્ષેત્રે પણ નોંધ લેવાય છે  તેવા નિષ્ણાંતે  કહ્યું હતું કે, કોરોના વિશ્વવ્યાપી રોગચાળો છે પરંતુ, આ બીમારીનાં લક્ષણ ભૌગોલિક પરિસ્થિતિ પ્રમાણે બદલાતા હોવાથી ગુજરાતે ઓટોપ્સી સંશોધન  કરવું જોઈએ. 

ઓટોપ્સીથી જ ઇબોલા વાયરસ ઉપર સંશોધન થયા હતા
તેમણે કહ્યું કે,  ઓટોપ્સીનો મુખ્ય હેતુ રોગનું કારણ- મારણ શોધવાનો હોય છે.  કોવીડ-૧૯  નવો રોગ છે ત્યારે ઓટોપ્સી કરવાથી શરીરના કયા અંગને વાયરસ કેવી રીતે ભરડો લે છે અને તેને નાથવા શુ ઉપાય કરી શકાય તે જાણવા મળે છે. ઓટોપ્સીથી જ ઇબોલા વાયરસ ઉપર સંશોધન થયા હતા અને નોંધપાત્ર પરિણામ હાંસલ થયા છે. ગુજરાતમાં કેસ વધવાને કારણે સંશોધનને મોટો અવકાશ છે. ગુજરાત સરકારે આ દિશામાં પહેલ પણ કરી છે. અત્યારે કોરોના સબંધિત ચીન, અમેરિકા, બ્રિટન, જર્મની, ઇટાલી વિગેરે દેશોએ કરેલા સંશોધન અંગેનું સાહિત્ય ઉપલબ્ધ છે જેની મદદથી પણ સંશોધન થઇ શકે છે.  ગુજરાતમાં સામાન્ય રીતે કોરોનાનો પ્રહાર ફેફસાં ઉપર થાય છે. તેમ છતાં જો ઓટોપ્સી કરવામાં આવે તો અન્ય કયાં અંગને અસર કરે છે. તે બાબતે ચોક્કસપણે દિશા નિર્દેશ પ્રાપ્ત થઇ શકે છે. પોસ્ટમોર્ટમ અને ઓટોપ્સીનો તફાવત દર્શાવતા એમણે કહ્યું કે, બન્નેમાં મૃતદેહની મૃત્યોત્તર શસ્ત્રક્રિયા કરવામાં આવે છે. પેથોલોજી ઓટોપ્સી દ્વારા મૃત્યુ પામનારનાં મરણનું કારણ જાણીને સંશોધન કરી શકાય છે. અત્રે ઉલ્લેખનીય છે કે, ડો.  લાન્જેવારે મુંબઈની ગ્રાન્ડ મેડિકલ કોલેજ અને જે. જે. હોસ્પિટલમાં 22 વર્ષ ક્લિનિકલ એક્સપર્ટ તરીકે કામ કર્યું છે જ્યાં તેમણે એઇડ્સનાં 236 દર્દીઓની  ઓટોપ્સી કરી હતી. ફળસ્વરૂપે એઇડ્સના દર્દીઓને રાહત થાય તેવી શોધ માટે માર્ગ પ્રશસ્ત થયો હતો.

અન્ય સમાચારો પણ છે...