કઢંગા સ્પીડબ્રેકર:ભુજમાં રોડ નવા બન્યા પણ ઠેર ઠેર કઢંગા સ્પીડબ્રેકરની ભરમારે મજા બગાડી

ભુજ નગરપાલિકાઅે દિવાળી પહેલાથી અાખા ભુજ શહેરમાં ડામર રોડના રિસર્ફેસિંગ કામ શરૂ કરી દીધા અને શહેરનો મોટોભાગ અાવરી પણ લીધો છે. જેની ચોમેરથી પ્રશંસા પણ થઈ રહી છે. પરંતુ, હવે ઠેરઠેર કઢંગા સ્પીડબ્રેકર બનાવી રોડની મજા જ બગાડી નાખી છે. જેની પણ ચોમેરથી ટિકા થઈ રહી છે.

ભુજ નગરપાલિકાની ડ્રેનેજ બ્રાન્ચે રોડ વચ્ચે ખોદકામ કરી રોડની મજા બગાડ્યા બાદ ઈજનેરી કાૈશલ્યા વિના ચેમ્બરને ઊંચે લાવી ઢાંકડા બેસાડવાનું શરૂ કર્યું હતું. જેની પણ ટિકાઅો થઈ હતી. જે ટિકાઅો હજુ સમે અે પહેલા હવે રોડ ઉપર વગદારોના ઈશારે અાડેધડ ડામર અને કપચી પાથરી રોડના રૂપ રંગ જ બદલી નાખ્યા છે. ઈજનેરી કાૈશલ્ય વિના બમ્પ બનાવી વાહન ચાલકો માટે કમરના દર્દ વધારી દીધા છે. ખાસ કરી મંગલમ ચાર રસ્તા પાસે તો વાહનચાલકો માટે માથાના દુખાવા રૂપ બમ્પ બની ગયા છે.

ભુજ શહેરની જનતા સહનશક્તિ ધરાવે છે અને સંબંધિત તંત્રો પાસે રજુઅાત કરવામાં નિષ્ક્રીય રહે છે. પરંતુ, કેટલાક કહેવાતા સામાજિક કાર્યકરો ભુજ નગરપાલિકા ઉપર દબાણ લાવી શોભામાં અભિવૃદ્ધિ કરવાને બદલે માર્ગોને કાબરચિતરા કરવામાં લાગી ગયા છે.