હાલાકી:દબાણ હટાવ્યા તેના પત્થર ઉપડ્યા નથી, ત્યાં બીજા દબાણની તૈયારી !

શહેરના મહત્વના વિસ્તારોમાં કિંમતી સરકારી જમીન પર વર્ષોથી દબાણ કરી બેઠેલા તત્વોમાં ફફડાટ વ્યાપી ગયો હતો તેવી સખત કાર્યવાહી જિલ્લા સમાહર્તાની સૂચનાથી તંત્રએ દિવાળી અગાઉ કરી હતી. છેલ્લા એકાદ મહિનાથી અનધિકૃત બાંધકામો તોડી પાડવામાં ન આવતા આવા તત્વોને કદાચ એમ થયું હોય કે, હવે છૂટ મળી ગઈ છે. ઇજનેરી કોલેજ રોડ પર એક અનધિકૃત બાંધકામ તોડી પડાયું હતું તેનો મલબો પણ હજી નથી ઉપડયો ત્યાં થોડું આગળ જ મોટી જમીન પરથી બાવળ સાફ કરી અને જમીન ખુલ્લી કરાઈ છે. સરકારી રાહે આ જમીન કોઈને ફાળવાઇ છે કે નહિ તે તપાસનો વિષય છે. આ અંગે ભુજ પ્રાંત અધિકારી અને ભાડાના સીઈઓ મનીષ ગુરવાણીએ જણાવ્યું હતું કે, અમે આ બાબતે તપાસ કરશું, અને જો દબાણની પેરવી કરતા માલૂમ પડશે તો કડક કાર્યવાહી થશે.