આક્ષેપ:સુરતની જેલમાં કેદીઓએ યુવાનની હત્યા કર્યાનો પરિજનોનો આક્ષેપ

ભુજનો યુવાન સુરતની લાજપોર જેલમાં પાસામાં ધકેલાયા બાદ ત્યાં મોત નિપજતા પરીજનોએ જેલમાં અન્ય કેદીઓના મારથી મોત થયો હોવાનો આક્ષેપ કર્યો છે. આજે ગુરુવારે સવારે તેની દફનવિધી પણ ભુજમાં કરવામાં આવશે. મારામારી અને હત્યાના પ્રયાસ જેવા શરીર સબંધી ગુનાઓમાં બે સગાભાઇ અસલમ ચાકી અને અખતર ચાકીને પાસામાં ધકેલાયો હતો. સુરતની લાજપોર જેલમાં મોકલાયેલા અસલમ ચાકીનું મોત નિપજયું છે, પિતા ઇસ્માઇલ ચાકીએ માધ્યમોને જણાવ્યું હતું કે, અસલમને સુરત લાજપોરમાં પાસામા ધકેલાયો ત્યાં જેલની બેરેકમાં માથાભારે શખ્સો સાથે રાખવામાં આવ્યો હતો.

જે તેની સાથે માથાકુટ કરતા હતા અને બેરેક બદલવા જેલ પ્રશાસનને રજૂઆત પણ કરાઇ હતી. ત્રણ દિવસ પૂર્વે પુત્રનો ફોન આવ્યો ત્યારે તેણે કહયું હતું કે મારા માટે દુઆ કરજો અને ત્યારે પેટમાં ખુબ દુખાવો થતો હતો અને પાસળી ભાંગી પડી હોવાની વાત કરી હતી. તરત જ પિતાએ જેલરને જાણ કરી દવાખાને લઇ જવાની વાત કરી હતી પણ તેને બીજા દિવસે હોસ્પિટલમાં લઇ જવાયો હતો જયાં તેનું મોત નિપજયું હતું. જેલ પ્રશાસનની બેદરકારી ગણાવી તેમના પુત્રની હત્યા કરવામાં આવી હોવાનો આક્ષેપ પરીવારજનોએ કર્યો હતો. પરીજનો મૃતદેહ લેવામાટે સુરત પહોંચ્યા હતા જે બુધવારે મોડી રાત્રે ભુજ આવી જશે. આજે ગુરુવારે સવારે તેના ઘરે દફનવિધી કરવામાં આવશે.