ધરપકડ:નાની મઉમાં વાયરની તફડંચી કરનારા ભુજ, માધાપર અને દેવપર ગઢના શખ્સો પકડાયા

માંડવી તાલુકાના નાની મઉ સીમ વિસ્તારમાં ઘોડાલખ વોટર સપ્લાયના બોરમાંથી વાયરની ચોરીના કેસનો ગઢશીશા પોલીસે ભેદ ઉકેલી લીધો છે. દેવપરગઢ રોડ પરથી ત્રણ આરોપીઓને રૂપિયા 7,360ના કેબલ તેમજ 50,000ના છકડારીક્ષા સાથે દબોચી લીધા છે. પ્રાપ્ત વિગતો મુજબ ગઢશીશા પોલીસની ટીમે બાતમીના આધારે ગઢશીશા-દેવપર રોડ પરથી છકડો રીક્ષામાં ચોરાઉ કેબલ વાયર લઇને જતા મુળ જુના જામથડા ગામના અને હાલ ભુજમાં રહેતા ઈસ્માઈલ મીઠુ નુરમામદ સોઢા, અને માધાપર હાઈવે પર રહેતા મહેશગર ઉર્ફે કાળો પ્રેમગર ગોસ્વામી તેમજ દેવપર ગઢમાં રહેતા સલીમ ભચુ સાટીને ઝડપી પાડવામાં આવ્યા હતા.

આરોપીઓના કબજામાંથી છકડો તેમજ કેબલ કબજે કરી કેબલ ચોરીનો ભેદ ઉકેલી લીધો હતો. આરોપીઓ વિરૂધ ગુનો નોંધીને આગળની કાર્યવાહી હાથ ધરી છે. આ કામગીરીમાં ગઢશીશા પોલીસ મથકના પોલીસ ઇન્સ્પેક્ટર આર.ડી.ગોજીયા સાથે તેમની ટીમ જોડાઇ હતી.

પકડાયેલા તસ્કરો બપોરના ભાગે કુહાડીથી કેબલ કાપી ચોરી કરતા હતા
પકડાયેલા આરોપીઓની મોડસ ઓપરેન્ડી બપોરના ભાગે અલગ અલગ જગ્યાએ વાડી વિસ્તારોમાં જઇને પાણીના બોરની મોટરના વાયરોને કુહાડીથી કાપીને ચોરીને અંજામ આપણા હતા.

આરોપી ઇસ્માઇલ વિરૂધ અગાઉ નોંધાયા છે ત્રણ ગુના
ત્રણેય આરોપીઓ પૈકી ઈસ્માઈલ મીઠુ નુરમામદ સોઢા વિરૂધ પોલીસ મથકમાં ચોરીના અલગ અલગ ત્રણ ગુનાઓ નોંધાઇ ચુક્યા છે અને તે આરોપી ગુનાહીત ઈતિહાસ ધરાતો રીઢો ગુનેગાર છે.