હાલાકી:નિરોણાના બસ સ્ટેશન પાસે ટ્રાફિકના કારણે લોકો પરેશાન

પાવરપટ્ટી પંથકના 10-15 ગામોના મુખ્ય મથક નિરોણાના બસ સ્ટેશન પાસે અવાર-નવાર સર્જાતી ટ્રાફિકના કારણે વાહનચાલકો અને રાહદારીઓને ભારે તકલીફ વેઠવવી પડી રહી છે. નિરોણામાં આસપાસના ગામના લોકો મોટી સંખ્યામાં વેપાર, રાશન તેમજ અન્ય ખરીદી માટે આવતા હોય છે. જે લોકો મન ફાવે ત્યાં વાહન પાર્ક કરી જાય છે, ઉપરાંત અહીંથી રોજ દસ-પંદર જેટલી ખાનગી, સરકારી બસો અવર-જવર કરે છે. તેના કારણે ટ્રાફિકમાં વધારો થાય છે.

સ્થાનિક પોલીસ દ્વારા સવાર તથા સાંજના સમયે આ વિસ્તારમાં એકાદ કર્મચારીને ફરજ પર મૂકવામાં આવે તો આડેધડ કરવામાં આવતી વાહન પાર્કિંગની સમસ્યા પર અંકુશ લગાવી શકાય તેમજ ટ્રાફિકમાં પણ ઘટાડો થાય શકે તેવી માંગણી સ્થાનિકોએ કરી છે. અત્રે ઉલ્લેખનીય છે કે, વર્ષો જૂના આ પ્રશ્નનો કોઇ ઉકેલ ન આવતાં લોકોને પારાવાર મુશ્કેલી પડી રહી છે અને ટ્રાફિકના પગલે અનેક માનવ કલાકો વેફડાય છે. વાહનો માટે પાર્કિંગની વ્યવસ્થા સાથે પોલીસ દ્વારા ટ્રાફિક સમસ્યાનો નીવેડો લાવવામાં આવે તેવી લોકમાંગ ઉઠી છે.