બચાવ:ટ્રેન ડ્રાઇવર અને બે મહિલાઓની સમયસૂચકતાથી એક જિંદગી બચી

ભુજથી મુંબઈ જવા નીકળેલી સયાજી એક્સપ્રેસ ટ્રેન ગુરુવાર રાત્રે સુરલભીટ પાસેના ફાટકથી જીઆઇડીસી હંગામી આવાસવાળા ફાટક પાસે પહોંચવાની તૈયારીમાં હતી ત્યારે જ અચાનક એન્જિન ડ્રાઈવરને થોડે દૂર અંધારામાં કોઈ માનવી ટ્રેન સામે પડતું મૂકતો હોય તેવું પ્રતીત થતા તાત્કાલિક ટ્રેનને બ્રેક લગાડ્યા હતા અને ત્યારે જ આ અજાણ્યા વ્યક્તિને બે મહિલાઓએ અચાનક ખેંચી લીધો હતો. ડ્રાઇવર અને બંને મહિલાઓની સાવચેતીના કારણે વ્યક્તિનો જીવ બચી ગયો હતો. કદાચિત નશામાં ઝઘડો કરી કે અન્ય કોઇ કારણથી પોતાના જીવનને ટૂંકાવવા નીકળેલા આ શખ્સે પડતું મૂક્યું હોવાનું સ્થાનિકેથી જાણવા મળ્યું હતું.

સૂત્રોમાંથી મળતી માહિતી મુજબ આ અગાઉ પણ એક ભાઈનો પગ કપાઈ ગયો હતો. આ વિસ્તારમાં ભઠ્ઠા અને મિલની આસપાસ અનેક વખત લોકો દારૂના નશામાં ઝઘડા કરતા હોય છે તેમજ અનેક વખત ઘરેલુ ઝઘડાઓના કારણે લોકો અગમ્ય પગલું ઉઠાવતા હોય છે. ટ્રેન ડ્રાઇવરો આ બાબતથી કાયમ સજાગ હોય છે. થોડા સમય પહેલાં ફાટક નં.33 પાસે મિરઝાપરનો યુવાન આકસ્મિક સંજોગોમાં ટ્રેનમાં આવી ગયો હતો.