કાર્યવાહી:મુન્દ્રાના અનાજ પ્રકરણમાં પુરવઠા વિભાગે મામલતદાર કચેરી પાસેથી રિપોર્ટ માગ્યો

23 દિવસ પૂર્વે સરહદી રેન્જની રેપીડ રિસપોન્સ સેલની ટુકડીએ મુંદરાના ગુંદી ફળીયામાં સરકારી અનાજનો સગેવગે થઇ રહેલો જથ્થો પકડી પાડયો હતો. લોકોને પહોંચાડવા અપાતો જથ્થો ગોડાઉનમાં પેકિંગ બદલીને બારોબાર વેંચાય તે પૂર્વે જ પોલીસે પકડી પુરવઠા વિભાગને જાણ કરી હતી. આ પ્રકરણમાં પુરવઠા વિભાગે મામલતદાર પાસેથી રિપોર્ટ માંગ્યો છે.

મુંદરાના ગુંદી ફળીયામાં આવેલી સંપત જે. મહેતાની સરકારમાન્ય સસ્તા અનાજની દુકાન પાસે આવેલા એક ગોડાઉનમાં આર. આર. સેલ.ની ટુકડીએ દરોડો પાડયો હતો. ગોડાઉનમાં મજુરો સરકારી અનાજનો જથ્થો પ્લાસ્ટીકના અન્ય પેકિંગવાળા કોથળાઓમાં પેકિંગ કરતા દેખાયા હતા. સંપત મહેતાના પુત્ર વિરાટ મહેતાની સુચનાથી આ મજુરો પેકિંગ બદલવાની કામગીરી કરતા હોવાનું દરોડા સમયે મજુરોએ પોલીસને જણાવ્યું હતું. પોલીસે 104 બોરી ઘંઉ, 88 બોરી ચોખાની, 11 બોરી ચણાની મળી કુલ 2.18 લાખનો સરકારી અનાજનો જથ્થો કબજે કર્યો હતો. તો દરોડા સમયે 68 રાશનકાર્ડ પણ મળી આવ્યા હતા.

પોલીસે જપ્ત કરેલા મુદ્દામાલ પૈકી અનાજનો જથ્થાનો કબજો પુરવઠા વિભાગે લઇ નિગમના ગોડાઉનમાં સીઝ કરી નાખ્યો હતો. સુત્રોમાંથી મળતી વિગતો મુજબ, પુરવઠા વિભાગ અધિકારીએ મામલતદાર પાસેથી અનાજના આ જથ્થા અંગેનો ખુલાસો કરતો રિપોર્ટ માંગ્યો છે. મામલતદારનો રિપોર્ટ આવ્યા બાદ ખાતાકીય કાર્યવાહી કરવામાં આવશે.

દુકાન સંચાલકનો પરવાનો રદ્દ થાય તેવી સંભાવના
મામલતદાર પુરવઠા વિભાગને રિપોર્ટ કરશે ત્યારબાદ પુરવઠા વિભાગ દ્વારા ખાતાકીય કાર્યવાહી હાથ ધરવામાં આવશે. ડિજીટલાઇઝેશન કરાયું છતાંય આટલો મોટો જથ્થો સગેવગે કરાતો હોવાથી દુકાન સંચાલકનું પરવાનો રદ્દ થાય તેવી સંભાવનાઓ સુત્રો વ્યકત કરી રહ્યા છે. દરોડા સમયે મળી આવેલા રાશનકાર્ડની સત્યતા પણ તપાસવામાં આવી રહી છે. દુકાન સંચાલકે અત્યાર સુધી કેટલા લોકોનો જથ્થો ચાંઉ કર્યો તે અંગે તપાસ કરવામાં આવે તો અનેકના પગ નીચેથી જમીન હટી જાય તેમ છે.