ચોરી:મિરજાપરમાં રાત્રિના ભાગે દોઢ કલાકમાં જ ઘરમાંથી દોઢ લાખની માલમતા ચોરાઇ

મીરજાપરમાં દબાસીયા હોસ્પિટલની બાજુમાં આવેલા એક મકાનમાં ગઇકાલે રાત્રે સાડા નવ વાગ્યાથી અગિયાર વાગ્યા સુધીના દોઢ કલાક જેટલા સમયમાં દોઢ લાખના દાગીના સહિતની માલમતા ચોરાઇ ગઇ હતી. મકાન માલિક મહિલાપાડોશમાં ગયા હતા ત્યારે ચોરી થતા એ ડિવિઝન પોલીસ મથકે ફોજદારી નોંધાવાઇ હતી.

પોલીસ સુત્રોમાંથી પ્રાપ્ત વિગતો મુજબ, સ્મિતાબેન મહેશભાઇ દરજી (વાઘેલા) (રહે. મીરજાપર, દબાસીયા હોસ્પિટલ નજીક)ના ઘરમાંથી 1,50,000ના દાગીના અને આઠ હજાર રોકડની ચોરી થઇ જવા અંગે એ ડિવિઝન પોલીસમાં ફોજદારી નોંધાવી હતી.

​​​​​​​ગઇકાલે તેઓ સાડા નવેક વાગ્યે પોતાના પાડોશમાં રહેતા મહિલાના ઘરે સાડી જોવા ગયા હતા બાદમાં અગિયાર વાગ્યે પરત આવતા રૂમમાંથી બળવાની વાસ આવતી હતી, પલંગમાંથી ધુમાડો નીકળતા આગનું છમકલુ થયું હતું અને ગોદડા સળગી ગયા હતા, તે ઓલાવ્યા બાદ જોતા પલંગમાં રાખેલા સોનાનો હાર નંગ 2, સોનાનો પેડલ અને બુટ્ટી કિંમત 1,50,000 અને 8 હજાર રોકડાની ચોરી થઇ હોવાનું જણાયું હતું.

તસ્કરો પલંગની અંદર દિવો સળગાવી ગયા
પાડોશીના ઘરે ગયા બાદ ત્યાંથી પરત રૂમમાં આવતા ધુમાડો થયો હોવાનું જણાયું હતું. પલંગની અંદર આગનું છમકલુ લાગેલુ હતું અને તસ્કર દિવો સળગાવી ગયો હતો. હાથફેરો કરવા પાછળ કોઇ જાણભેદુ હોવાની આશંકાઓ વ્યકત કરાઇ છે.