આરોપ:ભચાઉ તાલુકાના સામાખીયાળી મતદાર યાદીમાં બોગસ મતદારોના નામ હોવાનો કોંગ્રેસના ઉમેદવારનો આક્ષેપ

ભચાઉ તાલુકાના સામાખીયાળી જિલ્લા પંચાયત મતદાર યાદી 1માં દર્શાવેલા અનેક નામો બોગસ મતદાર તરીકે હોવાનો આક્ષેપ સામાખીયાળી જિલ્લા પંચાયત બેઠક પર કોંગ્રેસ પક્ષથી ઉમેદવારી નોંધાવનાર ભીખાભાઇ રબારીએ કર્યો છે. તેમણે એક યાદી દ્વારા જણાવ્યું છે કે, સામાખીયાળી મતદાર યાદી 1માં પરપ્રાંતિયો, ગામના રહેવાસીઓ ન હોય તેવા લોકોના નામો દર્શાવવામાં આવ્યા છે.

તેમાં અનેક નામો એકલા છે, તેમની અટક કે પિતાનું નામ પણ નથી જે ખરેખર બોગસ છે. તેના કારણે આગામી જિલ્લા પંચાયતની ચૂંટણીમાં બોગસ મતદાન થવાની સંભાવના રહેલી છે, તેથી તટસ્થ ચૂંટણી પ્રક્રિયા માટે આ પ્રકારના નામો રદ થવા અંગે રબારીએ ચૂંટણી પંચ કચ્છ અને કલેકટર કચ્છને ઉલ્લેખીને એક યાદી મારફત જણાવ્યું હતું.