હવામાન:12.6 ડિગ્રી સાથે નલિયા સૌથી ઠંડુ: ભુજમાં ગરમી 35 ડિગ્રી!

જિલ્લામાં પાંચ દિવસ સુધી હુંફાળું વાતાવરણ રહેવાના હવામાન વિભાગના વર્તારા વચ્ચે વિષમતા અનુભવાઈ હતી. ભુજમાં લઘુતમ 18.4 ડિગ્રી અને મહત્તમ 35.0 ડિગ્રી જેટલું ઉષ્ણતામાન નોંધાતા ખાસ તો બપોરે ઉનાળા જેવો માહોલ અનુભવાયો હતો. બીજી તરફ શીતનગરી નલિયા વધુ એક વખત 12.6 ડિગ્રી સાથે ગુજરાતમાં સૌથી ઠંડુ મથક બની રહ્યું હતું.

અહીં વધુમાં વધુ તાપમાન 33.4 ડિગ્રી રહેતા લોકોએ બેવડી મોસમનો અનુભવ કર્યો હતો. કંડલા એરપોર્ટમાં મહત્તમ 32.6 ડિગ્રીની સામે લઘુતમ 15.6 ડિગ્રી તાપમાન નોંધાતા અંજાર, ગાંધીધામ વિસ્તારમાં રાત્રે ટાઢક અને દિવસે ઉકળાટ અનુભવાયા હતા. કંડલા પોર્ટમાં ઓછામાં ઓછું ઉષ્ણતામાન 17.0 અને વધુમાં વધુ 28.1 ડિગ્રી નોંધાયું રહ્યું હતું. અત્રે ઉલ્લેખનીય છે કે, ગત સપ્તાહે પવનની સરેરાશ ઝડપ વધુ રહેતાં ઠંડીનો ચમકારો અનુભવાયો હતો.