હાલાકી:દાહોદ પાસે ભુજની બસને અકસ્માત, 37 પ્રવાસીઓ મધરાતે રઝળી પડ્યા

દાહોદથી ભુજ માટે સાંજે 6.30 કલાકે ઉપડેલી બસને સાંજે અકસ્માત નડતાં બંધ પડી ગઇ હતી જેને લઇને દાહોદના જવાબદાર અધિકારીઓને જાણ કરવા છતાં બસની મરંમત માટે તસદી લેવાઇ ન હોવાથી મધરાતે જંગલ વિસ્તારમાં મહિલાઓ અને બાળકો સહિત 37 મુસાફરો રઝળી પડ્યા હતા.

દાહોદથી રવાના થયેલી બસ સાંજે 7.15 વાગ્યાના અરસામાં ટ્રેક્ટર સાથે અથડાતાં સ્ટીયરિંગને નુકસાન થવાની સાથે બંધ પડી ગઇ હતી. દરમિયાન એસટીના જવાબદારોને આ ઘટનાની જાણ કરતાં સ્થળ પર મિકેનિકને મોકલાય છે તેવો જવાબ અપાયો હતો પણ રાત્રે 12 વાગ્યા સુધી કોઇ ફરક્યું ન હતું જેને લઇને બનાવના જંગલવાળા વિસ્તારમાં બાળકો અને મહિલાઓ સહિતના મુસાફરો ભૂખ્યા-તરસ્યા રઝળ્યા હતા.

બસમાં મુસાફરી કરી રહેલા માધાપરના મહેન્દ્ર વરૂએ દિવ્ય ભાસ્કર સાથે વાત કરતાં કહ્યું હતું કે, અકસ્માતના બે-ત્રણ કલાક સુધી સ્ટીયરિંગ માટે જરૂરી એવું ઓઇલ લઇને કોઇ ન આવતાં દાહોદના ટીસી તેમજ ડેપો મેનેજરનો મોબાઇલ પર સંપર્ક કરવાનો પ્રયાસ કરાયો હતો પણ આ બંને અધિકારીના ફોન સ્વીચઓફ જણાયા હતા. એસટીના સત્તાધિશોએ એક લિટર જેટલું સ્ટીયરિંગ ઓઇલ બનાવના સ્થળે સમયસર ન પહોંચાડતાં પ્રવાસીઓ મધ રાત સુધી જંગલ વિસ્તારમાં રખડી પડ્યા હોવાનો રોષ તેમણે વ્યક્ત કર્યો હતો.