માંગણી:વાગડની વીજ કચેરીઓમાં પૂરતા સ્ટાફની નિમણૂંક કરો

રાપર અને ભચાઉ તાલુકાની વીજ કચેરીઓમા સ્ટાફ ઘટના કારણે લોકો તેમજ ખુદ કર્મચારીઓ પણ મુશ્કેલીમાં મુકાય છે તેવી રજૂઆત ઉર્જામંત્રી સહિત ઉચ્ચકક્ષાએ કરતાં રાપરના ધારાસભ્યે સમસ્યાના ઉકેલ માટે તમામ કચેરીમાં તાત્કાલિક પૂરતો સ્ટાફ નીમવાનીમાગ કરી છે.રાપર અને ભચાઉ તાલુકાના વિશાળ વિસ્તાર તેમજ મોટી સંખ્યામાં રહેલી વસ્તીની દ્રષ્ટિએ ખુબ જ ઓછી સંખ્યા સાથે પીજીવીસીએલ કચેરી ખાતે કર્મચારીઓ ફરજ બજાવી રહ્યા છે. રાપર, ભીમાસર, ભચાઉ, અને સામખિયાળી ખાતેની કચેરીમાં સ્ટાફની ઘટ સતત ઘણા સમયથી વર્તાઇ રહી છે જેના કારણે દરેક ઓફિસમાં ગ્રાહકોની લાંબી લાઇન લાગે છે. હાલની સ્થિતિએ કોરોનાની મહામારીના કારણે ઓફિસ સ્ટાફ સહિત ગ્રાહકો પણ ભારે હાલાકી ભોગવી રહ્યા છે.

ગ્રાહકો દુર દુરથી કચેરી ખાતે આવે છે પણ ઓછા સ્ટાફને કારણે કામની રાહમાં ઘણીવાર લોકોને પોતાના ઘરે જવા માટે બસ અને ખાનગી વાહન પણ મળતા નથી. આમ પુરતો સ્ટાફ ન હોવાના કારણે લોકો તેમજ વીજ કર્મચારીઓને દરરોજ ભારે મુસીબત અને હાલાકીનો સામનો કરવો પડે છે. આ બાબતને તાત્કાલિક ધોરણે ધ્યાને લઈ સત્વરે રાપર વિધાનસભા હેઠળ આવતી તમામ પશ્ચિમ ગુજરાત વીજ કંપનીની કચેરીઓમાં જરૂરી પુરતા સ્ટાફની નિમણુક કરવા રાપરના ધારાસભ્ય સંતોકબેન ભચુભાઈ આરેઠીયાએ માગ કરી હતી.