વિવાદ:ભ્રષ્ટાચારના આરોપ કરનારને ધાકધમકી કરાતી હોવાનો આક્ષેપ

પાણી પુરવઠા વિભાગમાં કથિત ભ્રષ્ટાચાર અંગે લાંચ રૂશ્વત વિરોધી બ્યુરો દ્વારા કરવામાં આવી રહેલી તપાસમાં પણ વિલંબ થઈ રહ્યો છે અને આ અંગે સંલગ્ન કચેરીઓના કર્મચારીઓ દ્વારા ધાકધમકી કરાતી હોવાનો આક્ષેપ અરજદારે કર્યો હતો. ઉપરાંત ગાંધીનગર સ્થિત ઊચ્ચ અધિકારીઓ દ્વારા આ કેસ રફેદફે કરવાનું ષડયંત્ર ચાલી રહ્યું હોવાનું કહ્યું હતું. ચોથી ડિસેમ્બરે પ્રધાનમંત્રી પોર્ટલ પર ફરિયાદ કરી આ કૌભાંડી કર્મચારીઓને કડકમાં કડક સજા કરવામાં આવે તેવી માંગ કરી હતી. આ ઉપરાંત સજ્જડ પુરાવા હોવા છતાં ત્રણ વર્ષથી કોઈ કારણસર પ્રશ્નોનું નિરાકરણ કરાયું નથી. મુખ્યમંત્રી વિજય રૂપાણીને પાંચ વખત અરજી કરેલ છે, તેમજ રૂબરૂ જઈ આવ્યા બાદ પણ કોઈ પ્રત્યુતર મળ્યો નથી. લોકો સમક્ષ કૌભાંડ બહાર આવે તેવી શક્યતા વ્યક્ત કરતા અરજદાર ભરત અજાણીએ જણાવ્યું હતું કે, ધાકધમકી કરી મારો અવાજ દબાવવા પ્રયાસ કરાઈ રહ્યો છે.