હવામાન:લાંબા સમય બાદ નલિયામાં ન્યૂનતમ પારો બે આંકમાં(10.4)

સતત બીજા દિવસે રાજ્યમાં બીજા ક્રમે રહેલાં નલિયામાં લાંબા સમય બાદ ન્યૂનતમ પારો બે આંકમાં પહોંચીને 10.4 ડિગ્રી નોંધાતાં નગરજનોએ અગાઉ પડેલા કાતિલ ઠારમાંથી રાહત અનુભવી હતી. મોટા ભાગના કચ્છમાં મહત્તમ સરેરાશ 32 ડિગ્રી રહેતાં શિયાળો વિદાય લેતો જણાયો હતો.

શીત નગર નલિયામાં ઉંચું ઉષ્ણતામાન 32.7 રહેતાં દિવસે ઠંડી ગાયબ થઇ ગઇ હતી. કંડલા એરપોર્ટ મથકે 11.4 જ્યારે મહત્તમ 31.8 નોંધાયું હતું. ભુજમાં ન્યૂનતમ પારો ઉંચકાઇને 14.4 રહ્યો હતો જ્યારે વધુમાં વધુ 33 ડિગ્રીએ પહોંચ્યું હતું. કંડલા પોર્ટ ખાતે 14 અને 30.3 ડિગ્રી નોંધાયું હતું.