કોરોના સંક્રમણ:કોરોનાની સારવાર દરમિયાન વધુ 1નું મોત જાહેર કરાયું, સારવાર હેઠળ 264

કચ્છમાં કોરોનાની રસીના ડોઝ અપાય અે પહેલા કોરોનાથી સંક્રમિત લોકો વધતા જ રહ્યા છે, જેમાં જિલ્લામાં સોમવારે વધુ 26 પોઝિટિવમાંથી ગામડાઅોમાંથી પણ વધુ 12 અને શહેરોમાં 14 દર્દી ઉમેરાયા છે. ખાસ કરી ભુજમાં 5, અંજારમાં 3, ગાંધીધામમાં 4 અને રાપરમાં 2 પોઝિટિવ કેસ સાથે શહેરોમાં કોરોનાનો કહેર યથાવત રહ્યો છે. જે વચ્ચે 1 દર્દીનું કોરોનાની સારવાર દરમિયાન મોત તંત્રઅે ચોપડે ચડાવ્યું છે. કચ્છમાં અત્યાર સુધી કુલ 3435 પોઝિટિવ કેસ ચોપડે ચડાવાયા છે, જેમાંથી હજી સુધી કુલ 3054 દર્દી સાજા પણ થઈ ગયા છે. જોકે, હજુ 264 દર્દી સારવાર હેઠળ છે. પરંતુ અફસોસની વાત અે છે કે, સરકારી કચેરીઅોમાં પણ સોશિયલ ડિસ્ટન્સ જાળવવાની કે મોઢે માસ્ક ચડાવી રાખવાની તકેદારી રખાતી નથી. શહેરના લોકોઅેતો ભય મૂકી દીધો હોય અેટલી હદે બેદરકાર થઈ ગયા છે, જેથી શહેરોમાં દિવસોદિવસ ચિંતાજનક રીતે કેસ વધી જ રહ્યા છે.