કાર્યવાહી:કચ્છમાં તંત્રના સહયોગથી ગૌચર જમીન દબાણોનો આક્ષેપ કરાયો

રાજ્યસરકારે જમીનો દબાવીને બેઠેલા ભૂમાફિયાઓ સામે લેન્ડ ગ્રેબિંગ પ્રોહિબિશન એક્ટ તળે કાર્યવાહી કરવાનો આદેશ કર્યો છે ત્યારે જિલ્લા સમાહર્તા સમક્ષ કચ્છ જિલ્લામાં આવી દબાણયુક્ત જમીનો મુક્ત કરાવવાની માંગ કરાઈ છે.

જિલ્લા પંચાયતના પૂર્વ વિપક્ષી સદસ્ય હાજી સલીમ જતે કરેલી લેખિત રજુઆતમાં મજકૂર કાયદાને કચ્છના પરિપેક્ષ્યમાં જોઈએ તો અહીં સરકારની હજારો એકર જમીન વિકાસના નામે તંત્ર દ્વારા સાંઠગાંઠ રચી જમીન માફિયાઓ દબાવીને બેઠા હોવાનો ઉલ્લેખ કરી જો પ્રજા વિરોધ કરે તો તેમનો આવાઝ દબાવી દેવામાં આવતો હોવાની લાગણી વ્યક્ત કરી છે. હાલે નવી માપણીનો તમામ ડેટા ડીઆઇએલઆર કચેરીમાં ઉપલબ્ધ છે ત્યારે ગેરકાયદેસર દબાણયુક્ત જમીનની ખરાઈ કરી તંત્ર દ્વારા ટૂંક સમયમાં ઉચિત કાર્યવાહી કરાય તો જ સૂચિત કાયદાનો ઉદેશ્ય સિદ્ધ થશે તેવી વાત ઉચારી હતી.