માંગ:‘માંડવી-ગાંધીધામ વાયા મુન્દ્રા રેલ સેવાને બજેટમાં સમાવો’

95 વર્ષ પહેલાં માંડવીની મુલાકાતે આવેલા મહાત્મા ગાંધી અને ત્યાર બાદ 65 વર્ષ પૂર્વે બંદરીય નગરના પ્રવાસે આવેલા દેશના ત્રીજા રેલવે મંત્રી લાલ બહાદુર શાસ્ત્રી સમક્ષ માંડવીને રેલ સેવા આપવાની માગ કરાઇ હતી. આટલા લાંબા સમયથી આ દિશામાં કોઇ નક્કર કાર્યવાહી ન થતાં સ્થાનિક ચેમ્બર ઓફ કોમર્સે આગામી અંદાજપત્રમાં માંડવી-ગાંધીધામા વાયા ભદ્રેશ્વરની ટ્રેનને સમાવવાની માગનો પુનરોચ્ચાર કર્યો છે.

શહેરને રેલવે સાથે સાંકળવા 7 વર્ષ અગાઉ મોજણી કરાઇ હતી. ચાર દાયકા પૂર્વે પણ આવી જ રીતે સર્વે કરાયો હતો જેનું બાષ્પીભવન થઇ જતાં છેલ્લા સાડા ત્રણ દાયકાથી ચેમ્બરના પ્રમુખ વાડીલાલ દોશીએ આ મુદ્દે અનેકવાર સંબંધિત કક્ષાએ પત્ર વ્યવહાર કર્યો છે તેમ છતાં કોઇ ઠોસ પગલાં ભરાયાં નથી.

તાલુકામાં બેન્ટોનાઇટ અને લિગ્નાઇટ જેવા ખનીજ તેમજ ખેત પેદાશો પણ પુષ્કળ થતી હોવાથી રોડ મારફતે અવર જવર કરવાના બદલે રેલવેની સુવિધા અપાય તો પરિવહન ક્ષેત્રે સુરક્ષા સાથે સુગમતા રહે અને સમસ્યાઓનો અંત આવે તેમ છે. ચૂંટાયેલા પ્રતિનિધિઓ આ બાબતે દિલ્હી સુધી અવાજ પહંચાડે તેવી માગ ઉપપ્રમુખ પારસ શાહ, નરેન્દ્ર સુરૂ, ચંદ્રસેન કોટક, અરવિંદ ગાલા, નવીન બોરીચા સહિત સંસ્થાના અગ્રણીઓએ દોહરાવી હતી.