અકસ્માતમાં મોત:ટ્રક અડફેટે બાઇક સવાર વિદ્યામંદિરના ચપરાસીનું મોત, શાળાએ જતાં સર્જાયેલા અકસ્માતમાં એકને ઇજા

ગાંધીધામ અને કંડલા વચ્ચે બેફામ વાહન વ્યવહારને કારણે સમયાંતરે જીવલેણ અકસ્માતોની ઘટનાઓ બનતી રહે છે જેમાં આજે વધુ એક જીવલેણ ઘટનામાં બેફામ જઇ રહેલા ટ્રક ચાલકે બાઇક પર જઇ રહેલા કંડલા ભારતી વિદ્યાલયના પ્રાયમરી વિભાગના ચપરાશીનું ગંભીર ઇજાઓને કારણે મોત નિપજ્યું હતું, તેમની સાથે રહેલા એક કર્મીને ઇજાઓ પહોંચી હતી.

સુંદરપુરી ખાતે રહેતા અને કંડલા ભારતી વિદ્યામંદીર માધ્યમિક શાળામાં પટ્ટાવાળા તરીકે ફરજ બજાવતા 59 વર્ષીય ભુરાભાઇ લાલુભાઇ વાઘેલાએ ફરિયાદ નોંધાવી છે કે, આ જ શાળાના પ્રાયમરી વિભાગમાં પટ્ટાવાળા તરીકે ફરજ બજાવતા તેમના 41 વર્ષીય પુત્ર સુરેશચંદ્ર ભુરાભાઇ વાઘેલા તેમના સહકર્મી હંસ બહાદુર સાથે બાઇક પર શાળા તરફ જઇ રહ્યા હતા.

ત્યારે ગાંધીધામ કંડલા હાઇવે પર નિલકંઠ કાંટા પાસે પૂરપાટ આવેલા વાહન ચાલકે તેમના બાઇકને અડફેટે લેતાં 41 વર્ષીય તેમના પુત્ર સુરેશચંદ્રને ગંભીર ઇજાઓ પહોંચવાને કારણે મોત નિપજ્યું હતું તો તેના જોડે રહેલા હંસ બહાદુરને નાની મોટી ઇજાઓ પહોંચી હતી. તેમની ફરીયાદના આધારે બી-ડિવિઝન પોલીસે વાહન ચાલક વિરૂધ્ધ ગુનો નોંધી વધુ તપાસ હાથ ધરી છે.