ક્રાઈમ:રાહદારી યુવાનને બાઈક ભટકાડી, છરીથી હુમલો કર્યો

ગાંધીધામના ગુરુકુળ વિસ્તારમાં મજુરી કામ કરીને પરત જતા યુવાન પર બાઈક સવારે વાહન અથડાવ્યા બાદ લાજવાના બદલે ગાજીને છરી વડે હુમલો કરી ત્રણ ચાર ઘસરકાર ફરિયાદીને માર્યા હતા. ગાંધીધામના એ ડિવિઝન પોલીસ મથકે હસમુખ સોલંકીએ ફરિયાદ નોંધાવતા જણાવ્યું હતું કે તા.1 ફેબ્રુઆરીના સાંજે તેઓ તોલાણી કોલેજમાં પ્લબરીંગનું કામ પતાવીને પરત આવ્યા હતા અને ગુરુકુળ વિસ્તારમાં પી.એન. અમરશી સ્કુલની સામેથી પગપાળા તેના સુંદરપુરી ખાતેના રહેઠાણ તરફ મીત્રો સાથે જઈ રહ્યા હતા ત્યારે તેમના વિસ્તારમાંજ રહેતા આરોપી નિઝામ મિયાણા અચાનક સામેથી બાઈક પર આવ્યો અને વાહન ફરિયાદી સાથે અથડાવ્યું હતું. જેથી બંન્ને પડી ગયા હતા.

દરમ્યાન ફરિયાદીએ આરોપીને ઉભા કરવા જતા ફરિયાદીને માર માર્યો હતો અને છરી કાઢીને હુમલો કરી દીધો હતો. જેથી ફરિયાદીના હાથ, છાતી, ગાલમાં છરીથી ઘસરકો આવ્યો હતો. ફરિયાદી સાથે રહેલા મીત્રોએ છોડાવીને તેને લઈ ગયા હતા અને રામબાગ હોસ્પિટલમાં ફરિયાદીએ સારવાર મેળવી હતી. ગાંધીધામ એ ડિવિઝન પોલીસ મથકે ફરિયાદીએ આરોપી વિરુદ્ધ વાહન ભટકાડી, છરીની હુમલો કરી ઈજા કર્યાની અને જાતિ અપમાનિત કર્યાની ફરિયાદ નોંધાવી હતી.