કામગીરી:શહેરને ચોખ્ખુ ચણાક બનાવવાની દિશામાં પાલિકાએ શરૂ કરી કવાયત

ગાંધીધામ પાલિકા દ્વારા શહેરને ચોખ્ખુ ચણાક બનાવવાની દિશામાં કવાયત હાથ ધરવામાં આવી છે. જુદા જુદા વિસ્તારોમાં સફાઇ ઝૂંબેશ શરૂ કરીને હાલ જે રીતે લોકો દ્વારા ઘરમાં સફાઇ કરીને ઠાલવવામાં આવતો કચરો ઉપરાંત રસ્તા પરનો કચરો દૂર કરવા માટે પગલા ભરવામાં આવી રહ્યા છે. જુદા જુદા વિસ્તારોમાં થઇ રહેલી કામગીરી પૂર્ણતાના આરે છે.શહેરમાં દિવાળીના પર્વને લઇને લોકો ઘરમાં સફાઇ ઝૂંબેશ ચલાવી રહ્યા હતા. સફાઇ કામ બાદ કચરો એકત્ર કરીને નિયત કચરા પેટીમાં ઠાલવતા હતા. દરમિયાન પાલિકા દ્વારા તહેવારોની સિઝને ધ્યાનમાં લઇને વિવિધ પગલા ભરવામાં આવી રહ્યા છે. શહેરના વિસ્તારોમાં કચરો એકત્ર કરીને સફાઇ ઝૂંબેશ શરૂ કરવા કામગીરી હાથ ધરવામાં આવી રહી છે. પાલિકાના પ્રમુખ કાનજીભાઇ ભર્યા, કારોબારી સમિતિ ચેરમેન વિજય મહેતા, સેનિટેશન કમીટી ચેરપર્સન વિમલેશ શર્મા વગેરે દ્વારા મોનીટરીંગ કરાવીને વ્યવસ્થિત રીતે સફાઇ વધુને વધુ સઘન રીતે થાય તે દિશામાં પગલા ભરીને શહેરને ચોખ્ખુ બનાવવા કામગીરી શરૂ કરાઇ છે. અંદાજે ત્રણેક દિવસથી શરૂ થયેલી આ ઝૂંબેશને અનુલક્ષીને સફાઇ કામદારોને જોતરવામાં આવ્યા હતા.