વિવાદ:પાણી નિકાલ માટે પાઇપલાઇન નાખવામાં વૃક્ષનો ખો કાઢતા પર્યાવરણ પ્રેમીઓમાં રોષ

નગરપાલિકા દ્વારા ચોમાસામાં પાણી ન ભરાય તે માટે આત્મારામ સર્કલથી રેડક્રોસ સોસાયટીની ઓફિસની સામેના ભાગ સુધી પાઇપલાઇન નાખવાનો પ્રોજેક્ટ તૈયાર કરવામાં આવ્યો છે. આ કામગીરીમાં પણ ખોદકામ કર્યા પછી માટી સમથળ કરવી જોઇએ તેમાં કચાસ રાખવામાં આવી રહ્યાની ફરિયાદ પણ ઉઠી રહી છે. દરમિયાન ડીપીટીના મેદાનની સામેના ભાગે જ વર્ષો જુના વૃક્ષને દૂર કરવામાં આવતાં પર્યાવરણ પ્રેમીઓમાં તેના ઘેરા પ્રત્યાઘાત પડ્યા છે.

પાલિકા દ્વારા પર્યાવરણ બચાવવા માટે વધુ વૃક્ષ વવાય તે માટે પણ તકેદારી રાખવી જોઇએ તેવી માગણી પણ ઉઠી રહી છે. એક તબક્કે નગરપાલિકાએ કોઇ સંસ્થા દ્વારા શહેરની ફુટપાથ પર મુકવામાં આવેલા વૃક્ષના પિંજરા ટ્રાફિકને અડચણરૂપ હોવાનું બહાનું કાઢીને કેટલાક સ્થળેથી દૂર કર્યા હતા. જે તે સમયે આ ઝૂંબેશ સામે પાલિકાએ પગલા ભર્યા ત્યારે વિવાદ પણ થયો હતો.