શુભારંભ:કંડલાને વીજપુરવઠા માટે ખેંચાવું નહી પડે, નવું ટ્રાન્સફોર્મર શરૂ

ભાસ્કર ન્યૂઝ. | ગાંધીધામ / કંડલા ડીપીટી કંડલામાં વીજ પુરવઠાની આવશ્યકતા અને સપ્લાય વ્યવસ્થા વચ્ચે અંતર હોવાના કારણે વારંવાર વીજ પુરવઠો ખોરવાઈ જવાની સમસ્યાનો થતી હતી. જેને લક્ષીને પોર્ટ દ્વારા હવે 10મેગા વોલ્ટ એમ્પની ક્ષમતા ધરાવતા ટ્રાન્સફોર્મરની શરૂઆત કરાઈ હતી. પોર્ટના ડેપ્યુટી ચેરમેન નંદીશ શુક્લાએ પૂજન કરીને અધતન ટેક્નોલોજી ધરાવતા ટ્રાન્સફોર્મરની શરૂઆત કરાવી હતી. જે પોર્ટની સતત વધી રહેલી માંગને પહોંચી વળવામાં મદદરૂપ થશે અને પોર્ટ માટે વધુ આર્થિક લાભ આપનારુ રહેશે તેવો આશાવાદ વ્યક્ત કરાયો હતો. આ ટીસીની શરૂઆત સાથે પોર્ટની વીજ પુરવઠો સપ્લાય કરવાની ક્ષમતા જે અત્યાર સુધી 6.3 એમવીએ હતી, તે વધીને 16.3 એમવીએ થઈ ગઈ છે. આ ઉદઘાટન કાર્યક્રમમાં ડે. ચેરમેન સાથે વિવિધ વિભાગીય વડાઓ અને કર્મચારીઓ ઉપસ્થિત રહ્યા હતા.