ઉશ્કેરામણી:આદિપુરમાં ડ્રેસિંગ મુદ્દે અર્બન હેલ્થ ઓફિસરને થપાટ ઝીંકાઇ

આદિપુર ખાતે આવેલા અર્બન હેસ્થ સેન્ટરમાં ડ્રેસિંગ કરાવવા આવેલા ઇસમે અર્બન હેલ્થ ઓફિસરને બે થપાટ ઝીંકી દેતાં ચકચાર મચી હતી.આ બાબતે આદિપુરના ડીસી-5 ખાતે રહેતા અને અર્બન હેલ્થ ઓફિસર તરીકે સવા વર્ષથી ફરજ બજાવતા ડો.ધવલ ભારમલભાઇ બકુત્રાએ ફરીયાદ નોંધાવી છે કે આજે સાંજે 4 વાગ્યાના અરસામાં તેઓ પોતાની ફરજ પર હાજર હતા ત્યારે આદિપુરના મણીનગરમાં રહેતો અસલમ ઉમરભાઇ ઉનળ ડ્રેસિંગ કરાવવા આવ્યા હતા જેમને બેસવા જણાવી કમ્પાઉન્ડર આવીને ડ્રેસિંગ કરશે તેમ જણાવ્યું હતું.

કમ્પાઉન્ડર સામતભાઇ આવીને અસલમને ડ્રેસિંગ રૂમમાં લઇ ગયા જ્યાં અસલમે સામતભાઇને તું કેવું ડ્રેસિંગ કરીશ કહી ભૂંડી ગાળો આપતાં તેને સ્ટાફ સમજાવવા ગયો હતો પરંતુ અસલમે તેમને પણ ગાળો આપતાં અર્બન હેલ્થ ઓફિસર ડો.ધવલ ખુદ ત્યાં ગયા હતા અને અસલમને ગાળો બોલવાની ના પાડતાં ઉશ્કેરાયેલા અસલમે તેમને બે થપાટ ઝીંકી દીધી હતી. આ ઘટના સમયે હાજર સ્ટાફે અસલમને પકડી લીધો હતો. તેમણે આદિપુર પોલીસને જાણ કરતાં પોલીસ ઘટનાસ્થળે પહોંચી હતી. જ્યાં અર્બન હેલ્થ ઓફિસરે અસલમ વિરૂધ્ધ વિવિધ કલમો હેઠળ ગુનો દાખલ કરાવ્યો હતો. પોલીસ અસલમને રામબાગ હોસ્પિટલ ડ્રેસિંગ કરાવવા લઇ ગઇ હતી. પોલીસે તેમની ફરીયાદના આધારે ગુનો નોંધી વધુ કાર્યવાહી હાથ ધરી છે.