ધરપકડ:કંડલાના ફ્રોડના ગુનામાં ફરાર આરોપી પકડાયો, અંજારમાં ગુનાનો આરોપી 12 વર્ષે જબ્બે

કંડલા મરિન પોલીસ મથકે વર્ષ-2019 માં નોંધાયેલા વિશ્વાસઘાતના ગુનામાં દોઢ વર્ષથી ફરાર આરોપી પકડાયો હતો , તો અંજારમાં ખોટા દસ્તાવેજો ઉભા કરવાના કેસમાં નાસતો ફરતો આરોપી 12 વર્ષે ઝડપાયો હતો. કંડલા મરિન પોલીસ મથકે વર્ષ-2019 માં નોંધાયેલા વિશ્વાસઘાતના ગુનામાં છેલ્લા દોઢ વર્ષથી ફરાર અંજારના વરસામેડીના બાગેશ્રી ટાઉનશીપ-2 માં રહેતા મેહુલ નવિનચંદ્ર ઠક્કરને કંડલા મરિન પોલીસે પકડી લઇ કાયદેસર કાર્યવાહી કરી હતી.

આ અંગે મળતી માહિતી મુજબ વર્ષ 2009માં ખોટા દસ્તાવેજ ઉભા કરવા સંદર્ભે વિજય નગરમાં રહેતા મુકેશભાઈ વેલજીભાઈ સોરઠીયા પર ફોજદારી ફરિયાદ દાખલ કરવામાં આવી હતી. જે ત્યારથી જ નાસતો ફરતો રહ્યો હતો. જે અનુસંધાને 12 વર્ષ બાદ ગાંધીધામ-એ ડિવિઝન દ્વારા તેને ઝડપી લેવામાં આવ્યો હતો અને બાદમાં આગળની કાર્યવાહી માટે અંજાર પોલીસને સોંપવામાં આવ્યો હતો.