જામીન ફગાવી:બનાવટી ડીડ બનાવનારના આગોતરા નામંજુર

ગાંધીધામમાં 1993 ના સ્ટેમ્પ પેપર ઉપર બનાવટી ભાગીદારી ડીડ બનાવી તેના આધારે બેંક ખાતું ખોલાવી રકમ અંગત ઉપયોગમાં લેનાર આરોપીના ગાંધીધામ કોર્ટે આગોતરા જામીન ફગાવી છે. આ કેસની વિગતો એવી છે કે, ફરિયાદી મેહુલ પ્રેમજી સોરઠીયાએ ગાંધીધામ એ-ડિવિઝન પોલીસ મથકે ફરિયાદ નોંધાવી હતી કે તેમના પિતા પ્રેમજી વાલજી સોરઠીયાનું અવસાન 15 નવેમ્બર 2001 માં અમદાવાદ ખાતે થયું હતું.

તેમ છતાં વર્ષ 1993 ના જુના સ્ટેમ્પ પેપરઉપર ઓટો પાર્ટ્સ સેન્ટર ના નામે એક બનાવટી ભાગીદારી ડીડ તા.15 નવેમ્બર 2001 ના રોજ બનાવી તથા તે જ રીતે ફ્રોડ કરી પાવર ઓફ એટર્ની બનાવી તેને સાચા તરીકે ઉપયોગ કરી નવીન વાલજી સોરઠીયા, માવજી વાલજી સોરઠીયા અને ચેતન માવજી સોરઠીયા દ્વારા આપસરમાં સમજી લઇ ગાંધીધામ મર્કેન્ટાઇલ કો.ઓપ.બેંકમાં ખાતું ખોલાવી તેમાંની રકમ પેઢીમાં જમા કરવાને બદલે અંગત ઉપયોગ માટે રાખી છેતરપિંડી કરી હતી.

આ ફરિયાદ અનુસંધાને આરોપી માવજી વાલજી સોરઠીયાએ ગાંધીધામ એડિશ્નલ સેશન્સ જજ સમક્ષ આગોતરા જામીન માટે અરજી કરી હતી જેની તા.21 ડિસેમ્બર 2020 ના કરવામાં આવેલી સુનાવણીમાં ફરિયાદમાં જણાવાયેલા આરોપો ગંભીર હોવાથી અરજદારની આગોતરા જામીન માટેની અરજી કોર્ટે ફગાવી હતી.આ કેસમાં સરકારી વકીલ તરીકે કુ.હિતેષીબેન ગઢવીએ સરકાર પક્ષે દલીલો કરી હતી. તેમજ ફરિયાદીના વકીલ તરીકે એડવોકેટ એ.જે.ઠક્કર, ભરત હરિલાલ ઠક્કર અને હિરેન બલદાણિયા હાજર રહ્યા હતા.