જિલ્લા પંચાયત:તાલુકા પંચાયતના વિવાદાસ્પદ ઇજનેરનો રિપોર્ટ મોકલાશે, સરપંચોએ અધિકારી સામે ફરિયાદ કરી હતી

ગાંધીધામ તાલુકા પંચાયતના ઇજનેર ચાવડા સામે ગ્રામ પંચાયત અને સરપંચ સંગઠન દ્વારા તબક્કાવાર રજૂઆતો કરવામાં આવી હતી. અધિકારી વિકાસ કામની વિઝીટ લેતા નથી તે સહિતના મુદ્દે થયેલી રજૂઆત પછી લોકડાઉનને કારણે આ મુદ્દો શાંત રહ્યા પછી હવે ઉખેળાયો છે. આગામી દિવસોમાં તાલુકા પંચાયત દ્વારા જિલ્લા પંચાયતના કાર્યપાલક ઇજનેરને અહેવાલ મોકલી આપવામાં આવશે. ત્યાર બાદ અધિકારી સામે શું કાર્યવાહી થાય છે તેની ઉપર સરપંચ વર્તુળોની મીટ મંડાણી છે.  કચ્છની સૌથી નાનામાં નાની ગણાતી તાલુકા પંચાયતમાં જોવામાં આવે તો છેલ્લા કેટલાય સમયથી ભાજપનો દબદબો છે. કોંગ્રેસના સભ્યો છે તે પણ વિપક્ષની ભૂમિકા ભજવવી જોઇએ તે ભજવતા નથી તેવું ચિત્ર અવારનવાર તાલુકા પંચાયતની સામાન્ય સભામાં ઉપસી ચૂક્યું છે. દરમિયાન સરપંચ સંગઠન અને ગ્રામ પંચાયતો દ્વારા પંચાયતના ઇજનેર ચાવડા સામે વિવિધ ફરીયાદ કરવામાં આવી હતી. સ્થાનિકથી લઇને ઉચ્ચ કક્ષાએ કરેલી ફરીયાદ પછી તેની સામે અહેવાલ તૈયાર કરવા સૂચના આપવામાં આવી હતી. આ સૂચના પછી લાંબા સમય વિત્યાની સાથે લોકડાઉનની સ્થિતિ હોવાથી હવે આગળની કાર્યવાહી હાથ ધરાય તેમ જણાય છે. તાલુકા વિકાસ અધિકારી રમેશ વ્યાસે જણાવ્યું હતું કે, જિલ્લા પંચાયતના કાર્યપાલક ઇજનેરને આ અંગેનો અહેવાલ આપવામાં આવશે.