કાર્યવાહી:આદિપુરના મકાનમાંથી 70 હજારનો દારૂ મળ્યો

આદિપુરના વોર્ડ-6/એ માં સ્થાનિક પોલીસે બાતમીના આધારે મકાનમાં દરોડો પાડ્યો હતો જેમાં રૂ.70 હજારની કિ઼મતનો વિદેશી દારૂનો જથ્થો મળી આવ્યો હતો પરંતુ તે મકાનમાં ભાડે રહેતો આરોપી હાજર મળ્યો ન હતો. આ બાબતે પીએસઆઇ બી.વી.ચુડાસમાએ વિગતો આપી હતી કે, પોલીસ મથકની ટીમ ગત રાત્રે પેટ્રોલિંગ કરી રહી હતી ત્યારે જુમ્માપીર ફાટક પાસે પહોંચતાં બાતમી મળી હતી કે, વોર્ડ નંબર-6/એ મા઼ પ્લોટ નંબર 489 માં મકાન નંબર 4 માં રહેતા ભાડૂત સંજય ભૈરારામ ધવલેશાએ પોતે ભાડે રાખેલા મકાનમાં વિદેશી દારૂનો જથ્થો ઉતાર્યો છે.

આ બાતમી મળતાં જ તે મકાનમા઼ દરોડો પાડ્યો હતો જેમાં રૂ.70,800 ની કિંમતના ભારતીય બનાવટના અલગ અલગ બ્રાન્ડના વિદેશી દારૂની 156 બોટલો મળી આવી હતી પરંતુ દરોડા સમયે આરોપી સંજય ધવલેશા હાજર મળ્યો ન હતો. આદિપુર પોલીસે તેના વિરૂધ્ધ ગુનો નોંધી તેને પકડવા ચક્રો ગતિમાન કર્યા છે.