આક્રોશ:દેશલપર (વાં)ના નારાજ લોકોએ લગાવ્યા ચૂંટણી બહિષ્કારના બેનર

ભુજ તાલુકાના દેશલપર વાંઢાયમાં સીમની સર્વે નં. 230 પૈકીની જમીન મુદ્દે 31 જાન્યુઆરીએ ગ્રામજનોએ સજ્જડ બંધ પાળીને સમસ્યાના ઉકેલ માટે તંત્રને મહેતલ આપી હતી જે પૂર્ણ થતાં હવે ગામને જોડતા હાઇવે પર સ્થાનિક સ્વરાજ્યની ચૂંટણીના બહિષ્કારના બેનર્સ લગાવાયા છે જેને લઇને રાજકીય ગરમાવો આવી ગયો છે.

સૂચિત જમીનની ફાળવણી મુદ્દે અસંતુષ્ટ લોકોએ બંધનું એલાન આપ્યું ત્યારે કોઇ યોગ્ય નિરાકરણ નહિ આવે તો ચૂંટણીનો બહિષ્કાર કરાશે તેવી ચીમકી ઉચ્ચારાઇ હતી જેને લઇને ભુજ અને નખત્રાણાના હાઇવે પર બહિષ્કારના બેનર લગાવાયા હતા. આ અંગે સરપંચ મનીષાબેન ભગતનો સંપર્ક સાધતાં તેમણે કહ્યું હતું કે, બંધના એલાન બાદ તંત્ર કે કોઇ રાજકીય પક્ષે આ મુદ્દે તસદી લીધી નથી જેને લઇને લોકોમાં રોષ જોવા મળી રહ્યો છે. ઉલ્લેખનીય છે કે, આ બેનર્સ સોશિયલ મીડિયામાં વાયરલ થતાં ચર્ચાનો વિષય બન્યા હતા.