રાજકારણ:ચૂંટણી ટાણે જ લખપત તાલુકામાં યુવા કોંગ્રેસી નેતાનું રાજીનામું

અબડાસા વિધાનસભાની પેટા ચૂંટણીમાં કોંગ્રેસનો ગઢ ગણાતો લખપત તાલુકાના મતોમાં ગાબડા પડી ગયા છે, જેને સરભર કરવા માટે કોંગ્રેસી આગેવાનો-નેતાઓ પ્રયાસો કરી રહ્યા છે, તો સ્થાનિક સ્વરાજયની ચુંટણી પણ નજીક છે તેવે ટાણે જ દોલતપરના યુવા કોંગ્રેસી આગેવાને રાજીનામું ધરી દીધું છે, તેના પત્ની તાલુકા પંચાયતની સીટ પરથી વિજેતા બન્યા હતા.

દયાપર ખાતે કોંગ્રેસી આગેવાનો-કાર્યકરોની બેઠકમાં જિલ્લા પંચાયતની બે અને તાલુકા પંચાયતની 16 જેટલી સીટો પર સંભવીત ઉમેદવારોના નામની પેનલ પણ તૈયાર કરી દેવામાં આવી છે ત્યારે લખપત તાલુકાના કોંગ્રેસ સમિતિના મંત્રી આરબ એચ. જતે પોતાના રાજીનામાનો પત્ર જિલ્લા કોંગ્રેસ પ્રમુખને મોકલી આપ્યો છે. આ યુવા નેતાએ પોતાની રાજીનામાની કરેલી લેખિત રજૂઆતમાં કારણ અંગે કોઇપણ જાતનો સ્પષ્ટ ઉલ્લેખ કર્યો નથી, માત્ર પોતાના અંગત કારણોસર રાજીનામું આપતા હોવાની વાત કરી હતી.

આગામી દિવસોમાં યોજાનારી તાલુકા પંચાયતની ચૂંટણીઓને લઇને થોડા દિવસો અગાઉ થયેલી સંભવીત ઉમેદવારોની નક્કી કરવા માટેની બેઠક બાદ તેમણે પોતાનું રાજીનામુ ધરી દેતા કયાંક ને કયાંક ટીકિટ માટેની દાવેદારી હોય તેવું લાગી રહ્યું છે. જો કે અહીં યોજાયેલી બેઠક દરમિયાન પણ આ તાલુકા કોંગ્રસ સમિતિતા મંત્રીની ગેરહાજરી હતી. સંભવતી ટીકિટ ફાળવણીના મનદુ:ખનો મુદ્દો રાજીનામા પાછળ કારણભુત હોવાનું મનાઇ રહ્યું છે.