કામગીરી:આ વખતે અંજાર પાલિકા ટાર્ગેટ પૂર્ણ કરશે તે પાક્કું, માર્ચ પહેલા જ 60% ઉઘરાણી આવી

સામાન્ય રીતે માર્ચ મહિનો આવે ત્યારે નગરપલિકા જેની સ્થાનિક સ્વરાજ્યની સંસ્થાઓ બાકી વેરા વસુલાત માટે દોડાદોડો કરતી હોય છે. પરંતુ અંજાર નગરપાલિકા દ્વારા આ વખતે માર્ચ મહિનો પૂરો થાય તે પહેલાં જ ટાર્ગેટ પૂરું કરી લેવાશે તેવું પાક્કું લાગી રહ્યું છે, કારણ કે ચૂંટણીના કારણે વહીવટદાર એટલે ચીફ ઓફિસરને પાલિકાની સંપૂર્ણ સત્તા મળી જતા તેમને વેરા વસુલાતમાં અંગત રસ લીધો હતો અને 9 વોર્ડ તેમજ 3 ટીપી વિસ્તાર માટે અલગ અલગ એમ કુલ 13 ટિમો વસુલાત માટેે બનાવી હતી. જેના પરિણામના ભાગે માર્ચ આવે તે પહેલાં જ 60 ટકાથી વધુ વસુલાત આવી પણ ગઈ છે.

આ અંગે વેરા વસુલાત ઝુંબેશ ચલાવી રહેલા પાલિકાના સૂત્રોના જણાવ્યા અનુસાર પાલિકા દ્વારા છેલ્લા એક મહિનાથી સંપૂર્ણ ધ્યાન વેરા વસુલાત પર રાખવામાં આવ્યું છે. કર્મચારીઓની અલગ અલગ ટિમો દ્વારા ઘરે ઘરે જઈ વેરાઓની વસુલાત કરવામાં આવી રહી છે. ઉપરાંત જે લોકોના વધુ લેણા બાકી છે કે પછી મોટા માથાઓ છે તેમને ચીફ ઓફિસર જાતે ફોન અથવા રૂબરૂ મળી વસુલાત કરી રહ્યા છે.

જેના પરિણામના ભાગ સ્વરૂપે માર્ચ મહિનો આવે તે પહેલાં જ 60 ટકાથી વધુની વસુલાત થઈ ચુકી છે, હાલના પાલિકાને ટાર્ગેટ 70 ટકા વસુલાત હોવાનું આપવામાં આવ્યું છે પરંતુ સી.ઓ દ્વારા આ વખતે 80 ટકાથી વધુ વસુલાત થાય તેવી નેમ રાખવામાં આવી હતી. જે ટાર્ગેટ પણ માર્ચ મહિના સુધીમાં સરળતાથી આ વર્ષે પૂર્ણ કરી લેવામાં આવશે તેવું પાલિકાના સૂત્રોએ જણાવ્યું હતું.