ચૂંટણી:અંજાર પાલિકાની ચૂંટણીમાં અપક્ષ ઉમેદવારો ‘ગેમચેન્જર’ બનશે?

અંજારમાં 16 તારીખ બાદ નગરપાલિકાની ચૂંટણી અનુલક્ષીને ચિત્ર સ્પષ્ટ થયું છે અને પાલિકાની 36 સીટ માટે 83 ઉમેદવારો માંથી 4 અપક્ષ ઉમેદવારો મક્કમ રહી જતા હવે રાજકીય પક્ષોની ઊંઘ હરામ થઈ છે અને ક્રોસ વોટિંગ થવાની બીકે આ વખતે વોટબેંકમાં નુકશાન થવાની ભીતિ પણ સેવાઈ રહી છે. આ અંગે મળતી માહિતી મુજબ વોર્ડ નં. 8માં કોંગ્રેસ દ્વારા 3 ફોર્મ પરત ખેંચી લેવાતા ભાજપની 2 સીટો બિનહરીફ થઈ છે. જે અંગે પક્ષના આગેવાનો ખુશીની લાગણી ફેલાઇ છે. તો બીજી તરફ વોર્ડ નં. 2માં 1 7માં 1 અને 9માં 2 અપક્ષ ઉમેદવારોને ફોડવામાં રાજકીય પક્ષો નિષ્ફળ ગયા હતા.

આ અપક્ષ ઉમેદવારો મક્કમ રહી જતા જે તે વિસ્તારોમાં ક્રોસ વોટિંગ થવાનો ભય રહેલો છે. જેની સીધી અસર તમામ રાજકીય પક્ષોની વોટબેંક પર પડવાની શક્યતા ઉભી થઇ છે. જેના કારણે હવે રાજકીય પક્ષો દ્વારા સાવચેતી પૂર્વક પ્રચાર કરી અપક્ષ ઉમેદવાર તથા અન્ય પક્ષોના ઉમેદવારોને ઓછામાં ઓછા વોટ મળે તેવા પ્રયત્નો કરવામાં આવી રહ્યા છે. તો બીજો તરફ અપક્ષ ઉમેદવારો દ્વારા પણ જોર-શોરથી પ્રચાર શરૂ કરી દેવામાં આવ્યો હોવાથી આ વખતે અંજાર નગરપાલિકાની ચૂંટણી કાંટાની ટક્કર વાળી જોવા મળશે તેવુ રાજકીય વિશેષજ્ઞો જણાવી રહ્યા છે.