ક્રાઇમ:અંજારમાં માતાએ પુત્ર પર ઘરમાંથી ચોરીની ફરિયાદ કરી

અંજારમાં પુત્ર કોઈપણ જાતની જાણ કર્યા વગર બંધ મકાનના તાળા તોડી રૂ. 30,000 સામાનની ચોરી કરી જતા માતા દ્વારા ફરિયાદ નોંધાવવામાં આવી હતી. બનાવ અંગે અંજાર પોલીસ મથકેથી સ્વામિનારાયણ નગર, અંજારમાં રહેતા 50 વર્ષીય બીનાબેન પરેશભાઈ દાવડાની ફરિયાદને ટાંકીને મળતી માહિતી મુજબ ફરિયાદીના કબ્જાનું સવાસર નાકા, રામઓટા પાસે તેમના સસરાનું મકાન આવેલું છે. જે બંધ મકાનમાં સસરાનો સામાન પડ્યો હતો જેનો ફરિયાદીના જેઠ સાથે ભાગ પાડવાનો હતો.

પરંતુ તા. 23/12ના તે બંધ મકાન પર જતાં મકાનના તાળા તૂટેલા હતા અને તેમાંથી રૂ. 30,000ના 2 મોટા કબાટ અને તિજોરી ચોરાઈ ગયા હતા. જે બાબતે આજુ બાજુ પૂછતા 2-3 દિવસ પહેલા બીલેશ્વર મંદિર સામે રહેતા ફરિયાદીનો 19 વર્ષીય પુત્ર યશ આ સમાન લઈ ગયો હોવાનું જાણવા મળતા ફરિયાદીએ તેમના પુત્ર વિરુદ્ધ ચોરીની ફરિયાદ નોંધાવી હતી. જેથી પોલીસે આ બાબતે વધુ તપાસ હાથ ધરી છે.