ઉમેદવારના નામો:અંજારમાં કોંગ્રેસે 17 તા. પં.ની તેમજ 3 જિ.પં. સીટ માટે ઉમેદવારો જાહેર કર્યા

સ્થાનિક સ્વરાજ્યની ચૂંટણીને સંદર્ભે કોંગ્રેસ પક્ષ દ્વારા અંજાર તાલુકા પંચાયત તેમજ જિલ્લા પંચાયત બેઠકના ઉમેદવારો જાહેર કરાતા ગુરુવારે તમામ ઉમેદવારોએ વાજતે-ગાજતે ઉમેદવારીપત્રો ભર્યા હતા.અંજાર તાલુકા પંચાયતની 20 બેઠકો પૈકીની 17 તેમજ 4 જિલ્લા પંચાયતની બેઠકો પૈકીની 3 બેઠકના કોંગ્રેસના ઉમેદવારો જાહેર કરવામાં આવ્યા હતા.

જે અનુસંધાને ઉમેદવારીપત્રો ભરવાથી પહેલા કોંગ્રેસ દ્વારા રબારી સમાજવાડી ખાતે વિજય વિશ્વાસ સંમેલન યોજવામાં આવ્યું હતું. જેમાં કોંગ્રેસના જિલ્લા કક્ષાના આગેવાનો તેમજ કાર્યકરો ઉપસ્થિત રહ્યા હતા અને કોંગ્રેસના ઉમેદવારો જંગી લીડથી વિજયી બનશે તેવો વિશ્વાસ પ્રગટ કરવામાં આવ્યો હતો. બાદમાં તાલુકા પંચાયત અને મામલતદાર કચેરીમાં ઉમેદવારો દ્વારા ઢોલ-શરણાઈ સાથે ઉમેદવારીપત્ર ભરવામાં આવ્યા હતા. જેમાં 17 તા.પં. ની સીટો પર 17 ઉમેદવાર સાથે 2 ડમી ફોર્મ પણ ભરવામાં આવ્યા હતા. જ્યારે જિ.પં. ની સીટ પર 3 ઉમેદવારો સાથે 1 ડમી ફોર્મ ભરવામાં આવ્યો હતો.