હાલાકી:સરકારે ગ્રાન્ટ ચૂકવી છતાં પ્રાથમિક શિક્ષકો પગાર-પુરવણીથી વંચિત, ગ્રાન્ટ તો 7 નવેમ્બરે રિલિઝ કરી દીધી પણ ચૂકવાઇ નથી

રાજય સરકાર દ્વારા ગત તા.20/11ના રોજ ગાંધીનગર ખાતેથી જે-તે જિલ્લા વાઇઝ જરૂરી ગ્રાન્ટ ફાળવી દીધી હતી.આ ગ્રાંટ ફાળવ્યાને 15- 15 દિવસ થયા હોવા છતાં તંત્રની આડોડાઇ કે લાપરવાહીને કારણે જિલ્લાભરના શિક્ષકો પગાર અને પુરવણીથી વંચિત રહી જવા પામતા શિક્ષક આલમમાં આ બાબતે ભારે કચવાટો જોવા મળી રહ્યો છે. રાજય સરકારે માહે જુલાઇ :19થી ડિસેમ્બર :19 સુધીના છ માસ પૈકીના ત્રણ માસ માટેના પુરવણી માટેના પ્રથમ હપ્તાની રકમ ગત તા.7/11ના રોજ રીલીઝ કરી દીધી હતી. અને આ પુરવણી દિવાળી પહેલાં અચૂક ચૂકવી દેવાનો આદેશ હતો.

આ આદેશને અધિકારીઓએ અભરાઇ પર ચડાવી દીધો અને પુરવણીની રકમ હજી સુધી શિક્ષકોને ચૂકવવામાં નથી આવી. બાદમાં 20/11ના જ રાજય સરકારે નવેમ્બર પેઇડ ડિસેમ્બર અને ડિસેમ્બર પેઇડ જાન્યુઆરી એમ બે માસના પગાર માટે ભાવનગર જિલ્લાને એકોતેર કરોડની ગ્રાન્ટ ફાળવી દીધી.સમયસર ગ્રાન્ટ આવી જતી હોવા છતાં શિક્ષકોને ઇરાદાપૂર્વક મોડો પગાર ચુકવવામાં આવે છે એવું શિક્ષક આલમમાં ચર્ચાઇ રહ્યું છે.