અનોખો વિરોધ:કિસાન ક્રાંતિ ટ્રસ્ટ દ્વારા વાહન ચાલકોને ફ્રી શાકભાજી

દેશભરમાં આજે સંયુક્ત કિસાન મોરચા દ્વારા આંદોલન અંતર્ગત ચક્કાજામનું એલાન આપવામાં આવ્યું હતું, જેમાં કિસાન ક્રાંતિ ટ્રસ્ટ દ્વારા આજે શિહોર નજીક વળાવડ પાસે ભાવનગર- રાજકોટ પર ચકકાજામ કરવામાં આવ્યું હતું, પરંતુ ચક્કાજામ કાર્યક્રમ સાથે કિસાન ક્રાંતિ ટ્રસ્ટ દ્વારા એક નવતર અભિગમ અપનાવવામાં આવ્યો હતો, જેમાં દરેક વાહનને અટકાવી ખેડુતો વતી કોબીજ, ટમેટા, ડુંગળી વગેરે શાકભાજી ફ્રી આપીને કહેવામાં આવતું હતું કે છેલ્લી વાર ખેડુતો તરફથી ભેટ સ્વીકારી લેજો.

કિસાન ક્રાંતિ ટ્રસ્ટના કાર્યકરો દ્વારા ખુબ જ શાંતિપૂર્વક રીતે રોડ પર જતાં વાહનોને રોકી ખુબ મૈત્રીપૂર્ણ ભાવથી લોકોને સમજાવી રહ્યા હતા. ઘનશ્યામભાઈ મોરી, લક્ષ્મણ રબારી અણહિલભાઈ ઉલવા, પ્રવિણભાઈ પટેલ, બુધાભાઈ બારૈયા સહિત તમામની શિહોર પોલીસ દ્વારા અટકાયત કરાવડાવી લેવામાં આવી. કિસાન ક્રાંતિ ટ્રસ્ટના બોટાદ જિલ્લા પ્રમુખ હસમુખભાઈ કોરડીયાને તો ગઈ રાત્રે જ બોટાદ પોલીસ દ્વારા અટકાયત કરી લેવામાં આવી હતી.