સાઇકલ યાત્રા:દરિયા કિનારે પ્લાસ્ટિકનું પ્રદૂષણ ઘટાડવા 2 શિક્ષકોની 1600 કિ.મી.ની સાઇકલ યાત્રા

ભાવનગર જિલ્લાના બે શિક્ષકો શૈલેન્દ્રસિંહ ગોહિલ (ધ્રુપકા શાળા) અને મિલનભાઇ કે. રાવલ (તણસા રાજપરા શાળા) દ્વારા વેકેશન દરમ્યાન ગુજરાતના 1600 કિલોમીટર લાંબા દરિયા કિનારાની સાયકલ યાત્રાનું આયોજન કરવામાં આવ્યું હતું. આ સાઇકલ યાત્રા તારીખ 14 મેના રોજ કચ્છના કોટેશ્વરથી શરૂ કરવામાં આવી હતી અને 30 મેના રોજ વલસાડના ગોવાડા ખાતે પૂર્ણ કરવામાં આવી.

આ સાઇકલ યાત્રા દરમિયાન કોટેશ્વર, માંડવી, મુન્દ્રા, ગાંધીધામ, ભચાઉ, આમરણ, જામનગર, દ્વારકા, પોરબંદર, મહુવા, ભાવનગર, વટામણ, વડોદરા, ભરૂચ, સુરત, વલસાડ સહિતના શહેરોમાંથી પસાર થઈ હતી. આ સાઇકલ યાત્રાનો મુખ્ય હેતુ લોકો સાઇકલનું મહત્ત્વ સમજે, પોતાના રોજિંદા જીવનમાં ટૂંકા અંતર માટે સાઇકલનો ઉપયોગ કરે, સાથે-સાથે દરિયાકિનારે કે બીચ જેવા સ્થળોએ ફરવા જાય ત્યારે પ્લાસ્ટિકનું પ્રદૂષણ ઓછું કરે અને કુપોષિત બાળકો ફંડ એકત્રિત કરવાનો હતો. આ સાઇકલ યાત્રા દરમ્યાન વિવિધ ગામના લોકો, સાઇકલિંગ ક્લબ, લાયન્સ ક્લબ, પર્યાવરણ ક્લબ, રોટરી ક્લબ ભાવનગર, ભારત વિકાસ પરિષદ-પોરબંદર સહિતની સંસ્થાઓ, શિક્ષક સંઘના પ્રમુખ અને ઉચ્ચ અધિકારીઓ સાથે આ બાબતે વિચારોની આપ-લે કરવામાં આવી હતી.

ઉનાળાની કાળઝળ ગરમીમાં ભાવનગર જિલ્લાના આ બે શિક્ષકોએ વિવિધ હેતુસર ગુજરાતના કોટેશ્વરથી શરૂ કરી વલસાડ સુધીની 1600 કિલોમીટરની સાઇકલ યાત્રા કરી યુવાનો અને સમાજ માટે એક પ્રેરણાદાયી કાર્ય કરી ભાવનગર જિલ્લાનું ગૌરવ પણ વધારેલ છે.તેમની આ સરાહનીય પ્રવૃતિને લોકોએ આવકારી તેઓને અભિનંદન પાઠવ્યા હતા.