કડકડતી ઠંડી:પવનની ઝડપ 20 કિ.મી. થઇ જતાં ફરીથી શીતલહેર પ્રસરી, હવામાં ભેજનું પ્રમાણ 28 ટકા નોંધાયું

ભાવનગર શહેરમાં આજે વહેલી સવારથી ઉત્તર દિશાનો ટાઢોબોળ પવન ફૂંકાવાનો આરંભ થતા શહેર ફરીથી શીતલહેરના સકંજામાં સપડાઇ ગયું છે. શહેરમાં લઘુત્તમ ઉષ્ણતામાન ઘટીને 14.3 ડિગ્રી સેન્ટીગ્રેડ થઇ ગયું છે. જ્યારે મહત્તમ તાપમાન પણ ઘટીને 27.9 ડિગ્રી સેન્ટીગ્રેડ થઇ ગયું છે. તો શહેરમાં પવનની ઝડપ વધીને 20 કિલોમીટર થઇ જતાં મોડી સાંજથી કડકડતી ઠંડીનો અનુભવ નગરજનોને થયો હતો.

ભાવનગર શહેરમાં ગઇ કાલે મહત્તમ તાપમાન 28.9 ડિગ્રી સેન્ટીગ્રેડ હતુ તે આજે એક ડિગ્રી સેન્ટીગ્રેડ ઘટીને 27.9 ડિગ્રી સેન્ટીગ્રેડ થઇ ગયું હતુ. જ્યારે રાત્રે લઘુત્તમ ઉષ્ણતામાન 24 કલાક 14.6 ડિગ્રી હતુ તે આજે ઘટીને 14.3 ડિગ્રી થઇ ગયું પણ ખાસ અસર ટાઢાબોળ પવનની થઇ હતી. ગઇ કાલે પવનની ઝડપ 12 કિલોમીટર હતી તે આજે 8 કિલોમીટર વધીને 20 કિલોમીટર થઇ ગઇ હતી. આથી શીતલહેરનો અનુભવ થયો હતો. હવામાં ભેજનું પ્રમાણ 28 ટકા થયુ હતુ.